«Համախումբ ջանքերով ամրացնենք ու հզօրացնենք մեր սահմանային համայնքները». նախագահ Արմէն Սարգսեանի Կոչը

«Հայաստան» համահայկական հիմնադրամը նախաձեռնած է «Սահմանային համայնքներու հզօրացում» համահայկական դրամահաւաք-արշաւ, որ նպատակ ունի հաւաքուած ողջ գումարը ուղղել սահմանային համայնքներու ամենահրատապ ընկերային-տնտեսական խնդիրներու լուծման։

Այս մասին կոչով հանդէս եկած է Հայաստանի Հանրապետութեան նախագահ, «Հայաստան» համահայկական հիմնադրամի հոգաբարձուներու խորհուրդի նախագահ՝ Արմէն Սարգսեան, նշելով, որ վերջին օրերուն հայ-ատրպէյճանական պետական սահմանին հակառակորդի կողմէ ձեռնարկուած ռազմական գործողութիւնները կրկին կը մղեն Հայրենիքի շուրջ համախմբուելու և մեր ջանքերը անոր պաշտպանութեան ու հզօրացման ուղղելու:

Նախագահ Սարգսեան ընդգծած է նաեւ, որ տասնամեակներ շարունակ գտնուելով յարձակողապաշտ գործողութիւններու թիրախին, Հայաստանի սահմանամերձ համայնքներու բնակիչները ամուր կանգնած են իրենց հողին և դարձած են մեր անսասան սահմանապահները։ «Սահմանամերձ համայնքները Հայաստանի և Արցախի անվտանգութեան համար ռազմավարական նշանակութիւն ունեն, ուստի այդ համայնքներին անվտանգային, տնտեսական և սոցիալական աջակցութիւնը համազգային առաջնահերթութիւն է»,-ըսուած է Հանրապետութեան նախագահի խօսքին մէջ։

Արմէն Սարգսեան «Հայաստան» համահայկական հիմնադրամի հոգաբարձուներու խորհուրդի կազմին մէջ ընդգրկուած բոլոր պետական այրերուն, հոգևոր առաջնորդներուն, Հայաստանի և սփիւռքի մէջ գործող կուսակցութիւններուն, կազմակերպութիւններուն եւ անհատներուն կոչ ըրած է իրենց ողջ ներուժը ուղղել դրամահաւաքին՝ օգտագործելով Հիմնադրամի խողովակները: Դրամական փոխանցումները կարելի է կատարել «Հայաստան» համահայկական հիմնադրամի www.himnadram.org կայքի յատուկ այս նախաձեռնութեան համար ստեղծուած առցանց հարթակին կամ դրամատնային հաշուեհամարներուն միջոցով, ինչպէս նաև սփիւռքի մէջ կապուելով Հիմնադրամի տեղական կազմակերպութիւններու ներկայացուցիչներուն հետ՝ հաւաքուած միջոցները նաև այդ խողովակներով Հիմնադրամին փոխանցելու նպատակով։ «Հայրենիքը սկսում է սահմանապահ համայնքներից։ Այսօր սահմանամերձ համայնքների բնակիչները մեր, որպէս միասնական համահայկական ընտանիքի, աջակցութեան կարիք ունեն։ Համախումբ ջանքերով ամրացնենք ու հզօրացնենք մեր սահմանային համայնքները», իր կոչին մէջ շեշտած է Հանրապետութեան նախագահը:

Leave a Comment

You must be logged in to post a comment.