Համազգայինի Արցախի Գրասենեակը Յայտարարած Է Գրական–Ստեղծագործական Մրցոյթ
Համազգային հայ կրթական եւ մշակութային միութեան Արցախի գրասենեակը յայտարարած է գրական-ստեղծագործական մրցոյթ մը` Արցախի մէջ բնակող երիտասարդներուն համար:
Հետաքրքրականը այն է, որ մրցոյթին համար սահմանուած են տարբեր անուանակարգեր` բանաստեղծական եւ արձակ ժանրերու մէջ: Իսկ մրցոյթին նպատակն է ճանչնալ, բացայայտել, ներկայացնել Արցախի երիտասարդ ստեղծագործողները, նպաստել անոնց գրական աշխատանքներու տպագրութեան` սփիւռքի գրական թերթերու մէջ, ինչպէս նաեւ ներկայացնել զանոնք հայրենիքի եւ սփիւռքի մէջ:
Մրցոյթին նիւթերու եւ տեսակներու ընտրութիւնը պիտի ըլլայ ազատ, իսկ տարիքը` 18-30 տարեկան երիտասարդներ:
Հաղորդենք, որ գրական տարբեր անուանակարգերու մէջ յաղթողները պիտի արժանանան պատուոյ գիրերու եւ մրցանակներու, իսկ մրցոյթին արդիւնքները պիտի ամփոփուին յունիս 26-է յուլիս 2-ի միջեւ` Արցախի մէջ կայանալիք գրական-մշակութային օրերու ընթացքին: