Լոյս է տեսել ՀՅԴ պաշտօնաթերթ «Դրօշակ»ի 2025 թ․ չորրորդ թիւը
- (0)
Լոյս է տեսել «Դրօշակ»ի ապրիլեան համարը: Ինչպէս եւ ենթադրելի էր հայութեան համար առանձնայատուկ խորհուրդ ունեցող ամսին հրապարակուած «Դրօշակ»ի համարը նուիրուած է ցեղասպանութեան՝ հայութեան մաքառումի ու պայքարի թեմաներին: Թուրքիայի նկատմամբ եւ Հայոց Ցեղասպանութեան հարցում Հայաստանի այսօրուայ իշխանութիւնների որդեգրած «նոր» քաղաքականութիւնը իր շեշտադրումներն է պարտադրել ազգային կարեւորագոյն այս հարցերում՝ ցաւօք, ներքին լսարան տեղափոխելով այն բանավէճը, որը տարիներ շարունակ տարուել է արտաքին ճակատում, թուրքական ժխտողականութեան դէմ: Տուեալ խնդիրներին է անդրադառնում «Դրօշակ»ի այս համարն՝ իր Առաջնորդողով:
Պատմաբան Արմէն Կարապետեանը քննում է Հայոց Ցեղասպանութեան հարցը, որպէս պատմական եւ իրաւական առումով փաստարկուած եւ միջազգայնօրէն ընդունուած իրողութիւն: Միաժամանակ հեղինակը ներկայացնում է Արեւմուտքի անուղղակի մեղսակցութիւնն այս հարցում, ինչը բխում էր քաղաքական պահով թելադրուած վերջինիս երեսպաշտ գործունէութիւնից:
Պատմաբան Անի Մելքոնեանը անդրադառնում է միջազգայնօրէն ցեղասպանութեան յանցագործութեան իրաւական ճանաչմանը, այս հարցում միջազգային իրաւունքի մասնագէտ Լեմկինի գործադրած ջանքերին, որոնց հիմքում ընկած էր յատկապէս Հայոց Ցեղասպանութեան նախադէպը:
«Դրօշակ»ի սոյն համարում տեղ է գտել նաեւ Հայկազուն Ալվրցեանի յօդուածաշարի եզրափակիչ մասը՝ նուիուած Ցեղասպանութեան շրջանում համշէնահայութեան մղած հերոսական պայքարին: Սոյն յօդուածաշարում տեղ են գտել բազմաթիւ փաստեր, որոնք անցած դարասկզբի հայութեան հերոսամարտերի այս դրուագի լայն լուսաբանութեան հնարաւորութիւն են ստեղծում:
Պատմաբան եւ հրապարակախօս Դերենիկ Մելիքեանի յօդուածը պատմում է Պարսկաստանի տարածքում հայ եւ ասորի ժողովուրդների դէմ երիտթուրքերի իրականացրած ցեղասպանական սկզբնական գործողութիւնների մասին:
Արուեստաբան Մովսէս Ծիրանին հայոց գողգոթայի ողբերգական էջերին անդրադառնում է առաջին անգամ ընթերցողի ուշադրութեանը ներկայացնելով Արշիլ Կորքու քրոջ՝ Սեդայի հետ տարիներ առաջ իր արած հարցազրոյցը: Ինչպէս միշտ այս համարում եւս ներառուած են թեմային առնչուող հետաքրքրական մի շարք այլ յօդուածներ:
«Դրօշակ»ի 2025 թ. չորրորդ համարը համացանցում կարող էք գտնել droshak.am հասցէի ներքոյ:
