Իշխան Սաղաթէլեան. «Արժանապատիւ Ազգ Եւ Պետութիւն Դառնալու Պայքարը Այլընտրանք Չունի»

«Հայաստան» Դաշինքի անդամ, ՀՅԴ Հայաստանի Գերագոյն Մարմինի ներկայացուցիչ Իշխան Սաղաթէլեան կատարեց հետեւեալ յայտարարութիւնը.

Երկիրն աղէտի հասցրած իշխանութիւնը շարունակում է իր արշաւանքը սեփական պետութեան եւ ժողովրդի դէմ:

Իրենց հայրենադաւ ծրագրերն աւարտին հասցնելու համար բանակից հեռացնում են լաւագոյն սպաներին, ձերբակալում պատերազմի օրերին ինքնապաշտպանութիւն կազմակերպած համայնքների ղեկավարներին, եւ ամենեւին պատահական չէ, որ դա տեղի է ունենում հէնց Տաւուշում ու Սիւնիքում:

Բազմաթիւ անհատներ ապօրինի, կեղծ մեղադրանքներով կանչւում են հարցաքննութեան եւ ենթարկւում քաղաքական հետապնդումների:

Ամէն ինչ պարզ է. փորձելու են վերջնականապէս ջարդել մեր ազգի դիմադրողականութիւնը եւ այն պահող ուժերին ու անհատներին:

Մէկ մարդու բռնատիրութիւնը հաստատելու ձգտումը քողարկուելու է «ժողովրդի կողմից փոխվրէժի իրաւունք, պողպատէ լիազօրութիւն ստանալու» եւ «օրինականութիւն հաստատելու» անուան տակ:

Շատերը, այդ թւում` իրենց ընդդիմադիր համարող որոշ ուժեր, անասնական բնազդով հրճուելու են: Միջազգային կառոյցները, մարդու իրաւունքների պաշտպանութեամբ զբաղուող հասարակական կազմակերպութիւնները «հասկանալի» պատճառներով լռելու են…

Օրէցօր խորանալու է թշնամանքի եւ ատելութեան մթնոլորտը, ներքաղաքական ճգնաժամը նոր դրսեւորումներ է ունենալու, արժանապատուութեան, գիտելիքների տէր եւ կայացած բազմաթիւ մարդիկ արտագաղթելու են:

Հասարակութեանը շարունակելու են կերակրել ստով, կեղծիքով եւ ամբոխավարութեամբ:

Ի՞նչ Անել

Առաջինը` մերժել այս իրավիճակը, չընդունել եւ չհամակերպուել ստեղծուած իրավիճակի հետ:

«Հայաստան» դաշինքը Կեդրոնական ընտրական յանձնաժողովի կողմից մինչ այս պահն արձանագրուած տուեալներով ստացել է 270.000 քուէ, իսկ ընտրութիւններին մասնակցած գրեթէ իւրաքանչիւր երկրորդ քաղաքացի չի քուէարկել այս իշխանութիւններին:

Անհրաժեշտ է համախմբուել, գտնել արդիւնաւէտ եւ գործնական մեքանիզմներ, ստեղծելով ազգային դիմադրութեան շարժում` պայքարել անդադար, պայքարել աննահանջ մինչեւ վերջին շունչը` օգտագործելով ողջ պաշարները:

Նոր մօտեցումներով եւ մեթոտներով գիշեր-ցերեկ աշխատել մեր քաղաքացիների հետ, մտնել իւրաքանչիւր քաղաքացու տուն, դէմ առ դէմ բացատրել վիճակի լրջութիւնը:

Այն պահին, երբ այդ շրջանակները տեսնեն եւ գիտակցեն իրենց ու երկրին սպասուելիք մեծագոյն աղէտը, հայրենադաւ իշխանութիւնը կը շպրտուի պատմութեան աղբանոցը:

Մենք դա կարող ենք եւ անելու ենք, վստա՛հ եղէք:

Չընկճուե՛լ, չյուսահատուե՛լ, չնահանջե՛լ, չհիասթափուե՛լ:

Արժանապատիւ ազգ եւ պետութիւն դառնալու պայքարն այլընտրանք չունի:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆԻ
ՆԵՐԿԱՅԱՑՈՒՑԻՉ ԻՇԽԱՆ ՍԱՂԱԹԷԼԵԱՆ

Leave a Comment

You must be logged in to post a comment.