Երեւանի Մէջ Պիտի Կառուցուի Դրոյի Թանգարան

«Հին Երեւան» նախագիծով պիտի հիմնուի նաեւ 19-րդ դարու հայ ազատագրական շարժման գործիչ, ֆետայի, զօրավար Դրաստամատ Կանայեանի (Դրօ) թանգարան: Այդ նպատակով կը վերակառուցուի վաճառական, քաղաքային խորհրդարանի պատգամաւոր Մկրտիչ Ենգիբարեանի տունը, որ կը գտնուի ներկայիս Բուզանդի փողոցին վրայ:

1918-1920-ականներուն այդ տան մէջ ընտանիքով ապրած է Դրոն:

Ըստ PanARMENIAN.Net –ի ՝ Երեւանի աւագանիի «Իմ քայլը» խմբակցութեան անդամ Նուարդ Վարդանեան ֆէյսպուքեան իր էջին վրայ յայտնած է, որ տան ամրակայման համար Իտալիայէն հրաւիրուած է մասնագէտ Լորենզօ Եուրինան:

Տունը կառուցուած է 1908-1914-ին, ճարտարապետը Երեւանի մէջ բազմաթիւ շէնքերու հեղինակ Պորիս Մեհրապեանն է:

Դրոն նաեւ եղած է Առաջին Հանրապետութեան հիմնադիրներէն եւ ռազմական նախարար (1920-ին):