ԴՐՍԻ ԽՐԱՄԱՏԸ ՊԻՏԻ ՊԱՀԷՔ, ՄԻՆՉԵՒ ՆԵՐՍՈՒՄ ՀԱԿԱՀԱՅԿԱԿԱՆ ՏԱՐՐԵՐԻՑ ԱԶԱՏՈՒԵՆՔ

 

Ձեր գործը կրկնակի, եռակի դժուարացել է, որովհետեւ եթէ առաջ թէ ՀՀ, թէ ԱՀ արտգործնախարարութիւնները եւ Հայ Դատի յանձնախմբերն աշխատում էին միասին ձեռք-ձեռքի տուած, ապա հիմա դուք պէտք է աշխատէք եւ Հայ Դատի, եւ իրենց փոխարէն: Այս մասին ՀՅԴ Հայ Դատի յանձնախմբերի եւ գրասենեակների խորհրդաժողովի ժամանակ նշել է ՀՅԴ Արցախի ԿԿ ներկայացուցիչ Արթուր Մոսիեանը՝ ուղջունելով խորհրդաժողովի գումարումն Արցախում:

«Հայաստանի արտաքին գործերի նախարարութիւնը գիտէք ինչով է զբաղուած եւ շատ անգամ պետական տեսակէտը եւ մեր ազգային նպատակները չեն համընկնում: Ինչ վերաբերում է Արցախին, Արցախի եւ ՀՀ արտգործնախարարութիւնների միջեւ խզում կայ: Դուք պէտք է իրականութիւնն իմանաք: Ցանկացած հիւանդութիւն հնարաւոր է բուժել միայն այն դէպքում, եթէ ճիշտ ախտորոշում ես անում»,- ասել է Արթուր Մոսիեանը:

Նրա խօսքով՝ խորհրդաժողովը լաւագոյն հարթակն է Արցախի ներկայացուցչութիւնների եւ Հայ Դատի յանձնախմբերի համագործակցութեան հարցը բարձրացնելու, այդ առումով ԱՀ ԱԳՆ ակնկալիքները հասկանալու համար:

Արթուր Մոսիեանը եւս մէկ անգամ շեշտել է, որ Հայ Դատի յանձնախմբերին ու գրասենեակներին դժուար աշխատանք է սպասւում: «Դրսի խրամատը պիտի պահէք, մինչեւ մենք ներսում եղածը մաքրենք, հակահայկական տարրերից կարողանանք ազատուել, այն ժամանակ մենք միասին յաղթանակներ կը տօնենք, մինչեւ այդ պիտի մաքառենք, պայքարենք, ինչքան հնարաւոր է»,- իր ողջոյնի խօսքում ասել է ՀՅԴ Արցախի ԿԿ ներկայացուցիչը:

 

aparaj.am

Leave a Comment

You must be logged in to post a comment.