«Դաշնակցութիւնը կայուն պետականամէտ եւ հայաստանամէտ է». ՀՅԴ թեկնածու Նունէ Պետրոսեան

ՀՅԴ վարկանշային ցուցակով ԱԺ խորհրդարանական ընտրութիւններուն թեկնածու առաջադրուած Նունէ Պետրոսեան ծնած է 1968-ին: Աւարտած է Վայքի թիւ 1 միջնակարգ դպրոցը, Երեւանի Մխիթար Հերացիի անուան պետական բժշկական համալսարանի մանկաբուժական բաժանմունքը, Մոսկուայի բժշկական գիտութիւններու ակադեմիայի մանկաբուժութեան բաժանմունքը: Աշխատած է Վայքի բուժմիաւորման Փակ Բաժնետիրական Ընկերութեան մէջ որպէս մանկաբոյժ, եղած է Վայքի աւագանիի անդամ, աշխատած է Երեւանի քաղաքապետարանի թիւ 19 բուժարանէն ներս, որպէս փոխտնօրէն, 2016-էն ի վեր ՀՀ Բժշկասոցիալական Փորձաքննութեան գործակալութեան մանկական մասնագիտացուած Բժշկասոցիալական Փորձաքննութեան Յանձնաժողովի նախագահն է:

Yerkir.am-ը հետեւեալ զրոյցը ունեցած է Նունէ Պետրոսեանի հետ ընտրապայքարին եւ յառաջիկայի ծրագիրներուն մասին.

Հ.- Տիկի´ն Պետրոսեան, ինչո՞ւ էք որոշել ՀՅԴ-ի ցուցակով առաջադրուել ԱԺ պատգամաւորութեան թեկնածու:

Պ.- Դեռեւս 2000-ից լինելով ՀՅԴ անդամ` մշտապէս աշխոյժ գործունէութիւն եմ ցուցաբերել մեր երկրում դրական փոփոխութիւնների, պետականութեան ամրապնդման, հզօրացման գործում: Լինելով բժիշկ եւ 4 երեխաների մայր՝ հետամուտ եմ եղել ապագայ սերնդի, ապահով երկրի կերտմանը: Այսօր մեր երկրում առկայ` փոփոխուած իրավիճակն աւելի է պարտադրում մասնակից լինել ծաւալուող գործընթացներին, եւ ամենակարեւորը մասնակցութիւնն է առաջիկայ ԱԺ ընտրութիւններին:

Հ.- Ի՞նչ խնդիրներ էք տեսնում, որ Դաշնակցութիւնը պէտք է հետապնդի գալիք խորհրդարանում, եւ անձամբ Դուք ի՞նչ խնդիրներ էք բարձրացնելու, եթէ ընտրուէք:

Պ.- Դաշնակցութիւնը մշտապէս հետամուտ է լինում իր ուղեգծին եւ ծրագրերին: Դաշնակցութիւնը կայուն պետականամէտ եւ հայաստանամէտ է՝ անկախ հանգամանքներից եւ իրավիճակից: Դաշնակցութեան մարտահրաւէրներն ուղղուած են լինելու հայի տեսակի, հայ աւանդական ընտանիքի, հայ եկեղեցու, Հայաստան-Սփիւռք կապի, ազգային գաղափարների, արժեհամակարգի պահպանման գործին: Աշխատելով առողջապահական կազմակերպութիւններում, սոցիալական ոլորտում, կրթական եւ մշակութային հարցերին առնչուելով, քաջատեղեակ լինելով երեխաների եւ կանանց հիմնախնդիրներին, սոցիալապէս ծանր կացութեան մէջ գտնուող ընտանիքների խնդիրներին` ընտրուելու դէպքում օրէնսդրական մի շարք առաջարկութիւններով եմ հանդէս գալու ԱԺ-ում:

Հ.- Հաշուի առնելով երկրում առկայ իրավիճակը` յեղափոխութիւն, յետյեղափոխական էյֆորիա, քաղաքական ուժերի համար դժուար կը լինի համոզել ընտրողին, վստահութեան քուէ խնդրել: Ի՞նչ էք պատրաստւում առաջարկել, ի՞նչ նոր մօտեցում ու շեշտադրում էք անելու, որ հենց ձեզ վստահի ընտրողը, ձեր ուժին ընտրի:

Պ.- Դաշնակցութեանը երբեւէ բաժին չի ընկել վայելքների ինչ-որ ժամանակահատուած, եւ բոլոր ջրբաժաններում էլ պայքարելու պատճառներ ու առիթներ ենք ունեցել: Դաշնակցութիւնը ստեղծուած իրավիճակում պատրաստակամ է ամէն ինչ անել այս շարժման ցանկալի արդիւնքին հասնելու համար եւ իր անփոխարինելի դերն ունի մեր երկրի սոցիալ-տնտեսական զարգացման, քաղաքական ուղղուածութեան գործում: Հայաստանի հզօրացմանը, հայապահպանութեանը, աղքատութեան յաղթահարմանը, հարկային խելամիտ քաղաքականութեանը, սահմանամերձ շրջանների ապահովմանը, կեանքի որակի բարձրացմանը, Արցախի խնդրի յաջողմանը ուղղուած հարցերում Դաշնակցութիւնը, անհրաժեշտ քատրային ռեսուրսները եւ Սփիւռքի պոտենցիալն օգտագործելով, պէտք է վստահութեան քուէների արժանանայ: Ամենակարեւոր մեխն այն է, որ Դաշնակցութիւնն այս բոլոր լուծումները պէտք է ապահովի պետութեան անմիջական մասնակցութեամբ եւ օրէնքների փոփոխութեամբ: Լիպերալ տնտեսութեան զարգացումը, օտար արժեհամակարգի ընդունումը մեր երկիրը չեն կարող դուրս բերել այս վիճակից: Կարեւոր է նաեւ, որ ՀՅԴ-ն մէկ անձի շուրջ չի ձեւաւորուել:

Հ.- Արդեօ՞ք անհրաժեշտութիւն է, որ ՀՅԴ-ն ներկայացուած լինի գալիք խորհրդարանում: Որո՞նք են այս հարցում ձեր փաստարկները:

Պ.- Անկասկած է, որ Դաշնակցութեան ներկայութիւնը խորհրդարանում կարեւոր է. Դաշնակցութիւնն է այն միակ կուսակցութիւնը, որը սոցիալիստական գաղափարախօսութեան կրող է, ի տարբերութիւն առաջադրուած միւս կուսակցութիւնների, որոնք լիպերալ տնտեսութեան զարգացման կողմնակիցներ են: Այդ պատճառով ճիշդ չէ ԱԺ-ում` ե՛ւ իշխանութեան, ե՛ւ ընդդիմութեան մէջ, նոյն ուղղութիւնների ներկայութիւնը: ՀՅԴ-ն ներկայացուած է աշխարհի 30-ից աւելի երկրներում, այլ երկրների խորհրդարաններում: Ներկայացուած լինելով Սփիւռքում` միայն Դաշնակցութիւնն է, որ կարողութիւն ունի ողջ հայութեան ներուժը ծառայեցնել ի նպաստ հայոց պետականութեան հզօրացմանը: ՀՅԴ բլաթֆորմի հիմնական շեշտադրումը լինելու է սոցիալական արդարութեան, ազգային հարստութեան արդարացի բաշխման, երկրում աղքատութեան յաղթահարման, երիտասարդ սերնդի արժանապատիւ ապագայի կերտման ուղղութիւններով:

Մ.Բ.