«Գունեղ Տօնակատարութեան» Մասին Խօսիլը Անարգանք Է Զոհերու Յիշատակին

Կառավարութեան վերջին նիստում յայտարարուեց սեպտեմբերի 21-ին Հանրապետութեան հրապարակում կազմակերպուող «լայնածաւալ եւ գունագեղ տօնակատարութեան» մասին:

Անառարկելիօրէն, սեպտեմբերի 21-ը մեր ազգային, պետական տօնացոյցի ամենաարժէքաւոր օրերից է: Ուղիղ երեսուն տարի առաջ` 1991 թուականի սեպտեմբերի 21-ին, Հայաստանի ժողովուրդը քուէարկեց անկախ պետութիւն ստեղծելու օգտին: Անցնող տարիները պետականաշինութեան, մեր յաղթանակներն ամրապնդելու ժամանակներ էին, եւ մեր հաւաքական ճիգն ուղղուած էր անցած ճանապարհն արժեւորելու, մեր բացթողումները խմբագրելու եւ համազգային կամքով արժանապատիւ ապագայ կառուցելու նպատակին: Աւաղ, վերջին երեք տարիները եւ, յատկապէս, 44-օրեայ պատերազմը ո՛չ միայն խաթարեցին մեր պետականութեան ընթացքը, այլեւ անդառնալի մարդկային, ազգային-պետական կորուստների մատնեցին մեր հասարակութեանը` երկիրը կանգնեցնելով անորոշ ապագայի առջեւ:

Այսօր հազարաւոր զոհերի, խոցուած ինքնիշխանութեան, անվտանգային լրջագոյն մարտահրաւէրների, գերիների, համազգային չապաքինուած ցաւի մթնոլորտում «գունեղ տօնակատարութեան» մասին խօսելը ճիշդ չէ: Այն անարգանք է մեր զոհերի յիշատակին եւ արդարացիօրէն յարուցել է հերոս տղաների ծնողների, ընտանիքի անդամների եւ մեր հասարակութեան վրդովմունքը:

Մենք չենք հրաժարւում մեր անկախութիւնն արժեւորելու խորհրդից, բայց դրա լաւագոյն դրսեւորումը պիտի լինէր մեր պետականութեան ամրագրումը, պետական եւ ազգային հաստատութիւնների նկատմամբ իշխանութեան նախաձեռնած հետեւողական կազմաքանդման եւ նսեմացման արշաւի դադարեցումը, երկրում համերաշխութեան մթնոլորտի ձեւաւորումն ու սպառնալիքների իրական դիմագրաւումը:

Համոզուած ենք, որ անկախութեան 30-ամեակի առիթով պետական յանձնաժողով ձեւաւորելու պայմաններում կարելի էր երկրում ստեղծուած բարոյահոգեբանական մթնոլորտին համարժէք համեստութեամբ արժեւորել տօնը:

«Հայաստան» դաշինքը, միաժամանակ, յայտարարում, որ իր քաղաքական ողջ կարելիութիւնները ծառայեցնելու է մեր պետականութեան ամրապնդմանն ու ազգային շահերի սպասարկմանը:

«ՀԱՅԱՍՏԱՆ» ԴԱՇԻՆՔ

9 սեպտեմբեր 2021