Հայկական Եկեղեցիներ՝ «Տէյլի Թելեկրաֆ»ի Աշխարհի Ամենագեղեցիկ Եկեղեցիներու Ցանկին Վրայ


1007st-stephanos

Ս. Ստեփանոս հայկական եկեղեցին

 

 

ՊՈԼԻՍ, «Մարմարա».- Բրիտանական «Տէյլի Թելեկրաֆ» թերթին մէջ հրատարակուած է ցանկը աշխարհի 23 ամենագեղեցիկ եկեղեցիներուն, որոնց մէջ են աշխարհահռչակ Լալիպելայի տաճարը՝ Եթովպիոյ մէջ, Լաս Լահաս տաճարը՝ Քոլոմպիոյ մէջ ու Կաուտիի նախագծած Սրբազան Ընտանիքի տաճարը՝ Սպանիոյ Պարսելոնա քաղաքին մէջ։

Ցանկին վրայ տեղ գտած են նաեւ հայկական եկեղեցիներ։ Ամենագեղեցիկ եկեղեցիներու կարգին է Իրանի Բեթղեհէմի հայկական եկեղեցին, որ կառուցուած է 17րդ դարուն եւ կը գտնուի Սպահանի մէջ։ Անիկա ունի հրաշագեղ 72 որմանկարներ, եւ աչքառու է յատկապէս գմբէթը իր գեղեցկութեամբ ու ճարտարապետական իւրայատուկ լուծումներով։ Կը նշուի, որ այս եկեղեցին կը պահեն տեղի մօտաւորապէս 7000 հայերը, որոնք ստիպուած են յարմարելու իսլամական տարազի օրէնքին, սակայն նաեւ իրաւունք ունին պահպանելու իրենց ինքնութիւնը, մշակոյթը, լեզուն եւ 16 եկեղեցիները։

Ցանկին վրայ է նաեւ Իրանի Ս. Ստեփանոս հայոց եկեղեցին։ Մեկուսի եկեղեցին կը գտնուի կանաչ ու ծաղկուն հովիտի մը մէջ, Իրանի հիւսիս-արեւմուտքը։ «Այս եկեղեցին իր գոյութեամբ կը ջրէ այն պնդումը, թէ Իրան անապատներու եւ մզկիթներու երկիր է։ Անիկա եւս ունի գեղեցիկ որմանկարներ եւ կամարներ։ Ըստ կարգ մը հաւատալիքներու՝ Ս. Ստեփանոս եկեղեցւոյ մէջ ի պահ կը մնան Ս. Գրիգոր Լուսաւորիչի մասունքները», կը գրէ թերթը։

Աղբիւրը ցանկին մէջ ներառած է նաեւ Բեթղեհէմի Ս. Ծննդեան տաճարը։ Եկեղեցին ունի հայկական խորան. ԵՈՒՆԵՍՔՕի Մշակութային ժառանգութեան ցանկին վրայ գտնուող այս կոթողը համատեղութեան կարգով կը պատկանի Երուսաղէմի Ուղղափառ, Հայաստանեայց Առաքելական եւ Հռոմի Կաթոլիկ եկեղեցիներուն։ Հայաստանեայց եկեղեցիին կը պատկանի կառոյցին հարաւ-արեւմտեան հատուածը։

Ս. Ստեփանոս հայկական եկեղեցին

 

 


Leave a Comment

You must be logged in to post a comment.