«Սիսի Կաթողիկոսարանի Կալուածները Կը Պատկանին Հայ Ժողովուրդին». Արամ Ա. Կաթողիկոս
Սիսի կաթողիկոսարանը 1915-էն առաջ (Աղբիւր՝ ՀԲԸՄ, Նուպարեան գրադարանի հաւաքածոյ, Փարիզ)
ԵՐԵՒԱՆ, «Նիուզ».– Սիսի կաթողիկոսարանի նստավայրը եւ կալուածները հայ ժողովուրդին կը պատկանին եւ պէտք է վերադարձուին: 10 Նոյեմբերին լրագրողներուն հետ ունեցած հանդիպումին ընթացքին այս մասին յայտնած է Մեծի Տանն Կիլիկիոյ Արամ Ա. կաթողիկոս։
«Այս ուղղութեամբ մենք հետեւողական աշխատանքներու ձեռնարկած ենք նախորդ քանի մը տարիներուն ընթացքին: Պէտք է յիշեցնենք, որ իրաւական դաշտը այնքան ալ դիւրին չէ, այնքան ալ նպաստաւոր չէ մեր ժողովուրդին համար, սակայն պէտք է հաւաքական ճիգ գործադրել այս ուղղութեամբ: Բոլոր գործընթացները պիտի ճշդենք, որպէսզի մեր եկեղեցապատկան եւ ազգապատկան կալուածները վերադարձնենք մեր ժողովուրդին, մեր եկեղեցւոյ: Նախորդ տարի երկու վեհափառները միացեալ յայտարարութիւն կատարեցին. մենք կը պահանջենք մեր հազարաւոր եկեղեցիները, մեր մենաստանները, վանքերը», ըսաւ կաթողիկոսը: