Տիգրան Համասեան Արեւմտեան Հայաստանի Եկեղեցիներուն Մէջ Համերգ Պիտի Տայ

ԵՐԵՒԱՆ, «Երկիր».- Անուանի ճեզ նուագող-դաշնակահար Տիգրան Համասեան վերջերս աշխատանքներ կը տանի Երեւանի պետական սենեկային երգչախումբին հետ (գեղարուեստական ղեկավար՝ Յարութիւն Թօփիկեան)՝ ձայնասկաւառակ ձայնագրելու: Լրագրողներուն հետ ունեցած զրոյցին ընթացքին ան դիտել տուած է, որ արդէն շաբաթէ մը ի վեր աւարտած են աշխատանքները։
«Ալբոմը ձայնագրել է «ECM» ընկերութիւնը: Ամբողջ ձայնասկաւառակը հոգեւոր ստեղծագործութիւններ է ընդգրկում՝ 5-20րդ դարի գործեր, որոնք ես եմ մշակել երգչախմբի եւ դաշնամուրի համար: Ձայնասկաւառակը լոյս կը տեսնի 2015ի աշնանը: Այս ծրագիրը նուիրուած է Ցեղասպանութեան զոհերի յիշատակին, եւ մենք այս խմբով ծրագրում ենք 100 համերգ ունենալ այն երկրներում, որտեղ հայերը սփռուել են Ցեղասպանութիւնից յետոյ», նշած է դաշնակահարը:
«Երկիր»ի թղթակիցը յիշեցուցած է, թէ որոշ ժամանակ առաջ Համասեան փափաք յայտնած էր Ցեղասպանութեան 100ամեակին առիթով Արեւմտեան Հայաստանի հայկական եկեղեցիներուն մէջ համերգներ տալու՝ հարցնելով, որ արդեօք փափաքը կեանքի կոչելու ուղղութեամբ քայլերու ձեռնարկա՞ծ է։ Համասեան պատասխանած է, որ կարգ մը քայլերու դիմուած է. «Չեմ ուզում այդ մասին շատ խօսել, քանի որ դեռ ծրագրման փուլում է, բայց վստահեցնում եմ, որ նման համերգներ լինելու են»:
Յիշեցնենք, որ 28 Հոկտեմբերին Տիգրան Համասեան համերգով հանդէս պիտի գայ Ալ. Սպենդիարեանի անուան օփերայի եւ պալէի ազգային ակադեմական թատրոնին մէջ։