Դաշնակցութիւնը Արցախում վերահաստատեց իր յանձնառութիւնը


Մարտի 22-ից 24-ը ԼՂՀ մայրաքաղաք Ստեփանակերտում տեղի ունեցաւ Հ.Յ.Դաշնակցութեան մարմինների խորհրդաժողովը։

Աշխարհի քսան երկրներից, Հայաստանի Հանրապետութիւնից ու Արցախից մեկտեղուած դաշնակ­ցական պատասխանատուների քննարկման հիմնական թեմաներն էին ԼՂՀ սոցիալ-տնտեսական իրավիճակը, վերաբնակեցման հիմնահարցը, միջազգա­յին ասպարէզում Թուրքիայի եւ Ատրպէյճանի հակահայկական լոբբինգը չէցոքացնելու, Արցախին ի նպաստ աշխատանքներին նոր թափ ու բովանդակութիւն հաղորդելու խնդիրները, ԼՂՀ միջազգային ճանաչման հեռանկարները, ինչպես նաեւ Հայաստանի Հանրապե­տութիւնում ու Արցախում կուսակցութեան հզօրացումը։

Անդրադարձ եղաւ նաեւ տարածաշրջանային վերջին զարգացումներին, Արեւմուտք-Ռուսաստան նոր դիմակայութեան պայմաններում Հայաստանի ու հայութեան անելիքներին, սուրիահայութեան աջակցութեան աշխատանքներին. մասնաւորաբար քննարկուեցին Քեսապի վերջին իրադարձութիւնները եւ կուսակցութեան անելիքները։

Խորհրդաժողովը ամփոփեց յիշեալ ուղղութիւններով մինչեւ այժմ կատարուածը եւ նախանշեց յառաջիկայ անելիքները։

Յատուկ ընդգծուեց Արցախի տնտեսութեան արդիականացման, Սփիւռքի ու Հայաստանի մտաւոր ներուժով նոր տեխնոլոգիաների ներդրման, անվտանգութեան բարձրացման անհրաժեշտութիւնը։

Խորհրդաժողովը վերահաստատեց Դաշնակցութեան յանձնառութիւնը՝ հնա­րաւոր բոլոր միջոցներով Արցախին աջակցելու, միջազգային ասպարէզում նրա շահերն ու իրաւունքները պաշտպանելու հարցում։

Մտահոգութեամբ արձանագրուեց, որ վերջին միջազգային զարգացումների արդիւնքում Հայաստանի Հանրապետութիւնը, Արցախն ու Սփիւռքը բարդ միջազգային մարտա­հրաւէրներ են դիմագրաւում, որոնց յաղթահարումը համախմբուած կամք, վճռակա­նութիւն եւ ամենօրեայ աշխատանք է պահանջում, այլապէս կարող է վտանգուել մեր ազգային-պետական նպատակների իրականացումը։ Շեշտուեց, որ մենք պարտաւոր ենք յենուել միմիայն հայութեան հաւաքական ներուժի վրայ եւ համախմբուած գործողութիւններով չէզոքացնել առկայ սպառնալիքները։

Դաշնակցութեան համար շարունակում է գերխնդիր մնալ Արցախեան յաղթանակի վերջնական ամրագրումը, Արցախի բնակչութեան բարեկեցութիւնը, խաղաղ, կայուն զարգացումն ու նրա իրաւունքների պաշտպանութիւնը։

Խորհրդաժողովի աւարտին մասնակիցներին ընդունեց ԼՂ Հանրապետու­թեան նախագահ Բակօ Սահակեանը։

ՀՅԴ ՄԱՄԼՈՅ ԴԻՒԱՆ

24 Մարտ 2014թ.


Leave a Comment

You must be logged in to post a comment.