Որդեգրուեց Արցախի երիտասարդական կազմակերպութիւնների հռչակագիրը
Մայիսի 9-ին Արցախի Հանրապետութեան Ազգային ժողովի նիստերի դահլիճում տեղի ունեցաւ ՀՅԴ Արցախի երիտասարդական միութեան նախաձեռնած «Արցախի երիտասարդական համաժողով»-ը։
Այս մասին տեղեկացնում է ՀՅԴ Բիւրոյի Երիտասարդական գրասենեակի պատասխանատու Արշակ Մեսրոպեանը:
Համաժողովին մասնակցում էին թւով 32 քաղաքական կուսակցութիւնների երիտասարդական և ուսանողական միութիւններ, երիտասարդական հասարակական կազմակերպութիւններ եւ Արցախում գործող բոլոր համալսարանների ուսանողական խորհուրդները։ Համաժողովին ներկայ էին եւ նախաձեռնութիւնը ողջունելու ելոյթներով հանդէս եկան ԱՀ Արտաքին գործերի նախարար Դաւիթ Բաբայեանը, ԱՀ Մարդու իրաւունքների պաշտպան Գեղամ Ստեփանեանը, ինչպէս նաև ՀՅԴ Արցախի Կեդրոնական Կոմիտեի անդամ Սերգէյ Շահվերդեանը։
Համաժողովի աւարտին ընթերցուեց եւ որդեգրուեց պատմական Հռչակագիրը։ Արցախի երիտասարդական կազմակերպութիւններին յաջողուեց համախմբուել մէկ օրակարգի շուրջ, սկիզբը դնելով ուշացած բայց առաջնային անհրաժեշտութիւն ունեցող՝ Համազգային օրակարգի ձեւաւորմանը։
Առաջիկայում ձեւաւորուելու է աշխատանքային կազմ կոմիտէ, որտեղ ընդգրուած են լինելու բոլոր կազմակերպութիւններից ներկայացուցիչներ։ Աշխատանքային կոմիտէի առաջին անելիքը լինելու է հռչակագրի էութիւնից եւ բովանդակութիւնից բխած ճանապարհային քարտէսի մշակումը, որն իր մէջ ամփոփելու է առաջիկայ տարիների հստակ գործողութիւնների փաթեթ։
Ստորեւ կը գտնէք հռչակագրի ամբողջական բովանդակութիւնը․
«Արցախի Հանրապետութեան երիտասարդական կազմակերպութիւնների
Հ Ռ Չ Ա Կ Ա Գ Ի Ր Ը
Մենք՝ Արցախի երիտասարդական կազմակերպութիւնների ներկայացուցիչներս,
Հաշուի առնելով 2020թ․-ի աշնանը Արցախի Հանրապետութեան եւ նրա խաղաղ բնակչութեան նկատմամբ սանձազերծուած ադրբեջանական-թուրք-ահաբեկչական 44 օրեայ պատերազմի հետեւանքով․
- Հայրենիքի զգալի մասի բռնազաւթումը,
- Հազարաւոր զինուորների, կամաւորների, ազատատենչ հայորդիների նահատակութիւնը,
- Պատերազմի հետեւանքով հազարաւոր անյայտ կորած, հաշմանդամութիւն ձեռք բերած եւ վիրաւորում ստացած անհատների ճակատագիրը,
- Տասնեակ հազարաւոր մեր հայրենակիցների տեղահանութիւնը,
- Սոցիալ-տնտեական եւ քաղաքական ծանր ճգնաժամը,
- Պետութեան առջեւ ծառացած լրջագոյն մարտահրաւէրները,
Կարեւորելով`
Ազգային ներուժի համախմբման, նորոգման եւ ամրապնդման գործում Հայաստան-Արցախ-Սփիւռք եռամիասնութեան բացառիկ հնարաւորութիւնները
Գիտակցելով՝
Պետութեան զարգացումը, հզօրացումն ու յարատեւութիւնը ապահովելու հրամայականը
Յարատեւ պայքարի վճռականութեամբ յայտարարում ենք, որ յանձնառու ենք․
- Վերականգնել Արցախի Հանրապետութեան տարածքային ամբողջականութիւնը,
- Իրացրած լինելով ժողովուրդների իրաւահաւասարութեան եւ ազատ ինքնորոշման սկզբունքը՝ հետապնդել Արցախի Հանրապետութեան անկախ եւ ինքնիշխան անխուսափելի կարգավիճակի՝ միջազգային ճանաչումը,
- Լծուել պետականաշինութեան, անվտանգային, ազգային, պատմամշակութային եւ հոգեւոր հիմնասիւների, ինչպէս նաեւ սոցիալ-տնտեսական ենթակառուցուածքների զարգացման, հզօրացման եւ ամրապնդման սուրբ գործին։
Արձանագրելով, որ Արցախի հարցի կարգաւորումը հանդիսանում է համայն հայութեան գերագոյն իտէալի՝ միացեալ Հայաստանի կերտման առաջին հանգրուանը՝ մենք կոչ ենք անում աշխարհասփիւռ հայութեանը, մասնաւորաբար հայ երիտասարդութեանը իր ողջ ներուժը, գիտելիքները, հնարաւորութիւններն ու մասնագիտական կարողութիւնները ի սպաս դնել վերոնշեալ նպատակների իրագործմանն ու իրականութիւն դարձնել Արցախեան հակամարտութեան վերջնական եւ հաեանպաստ կարգաւորումը»:
