«Յաղթելու Համար Մեզ Ամենաշատը Պէտք Է Հաւատալ». Արայիկ Յարութիւնեանի Ուղերձը՝ Սահմանագիծէն
Արցախի նախագահ Արայիկ Յարութիւնեան 22 Հոկտեմբերին այցելեց սահմանագիծ եւ զինուորներուն հետ հանդիպումէն ետք որոշեց խրամատէն յատուկ տեսաուղերձով դիմել հայ ժողովուրդին:
«Սիրելի՛ հայրենակիցներ, ուզում եմ ձեզ դիմել առաջնագծից՝ հակառակորդից ընդամէնը մի քանի հարիւր մետր հեռաւորութիւնից: Յաղթելու համար մեզ ամենաշատը պէտք է հաւատալ: Ամենամեծ ուժն ունի հաւատքը: Ես հաւատում եմ, որ մենք յաղթելու ենք: Ուզում եմ, որ մեր բոլոր եկեղեցիներում աղօթեն մեր նահատակների եւ, ի հարկէ, առաջնագծում կռուող զինուորների համար: Ուզում եմ, որ ամէն հայ ամէն օր աղօթի մեր յաղթանակի համար: Ուզում եմ, որ այսօրուայ եղած միասնականութիւնը պահպանուի: Ուզում եմ, որ բոլորդ գիտակցէք՝ ձեզնից է կախուած մեր ազգի ապագան: Ուզում եմ, որ օր առաջ, ժամ առաջ կատարէք հայրենիքի նկատմամբ ձեր պարտքը՝ հնարաւորութեան դէպքում այդ պարտքը՝ առաջնագծում: Սահմանում ձեզ սպասում են աւելի քան երբեւէ: Պատուով կատարէք հայրենիքի նկատմամբ ձեր պարտքը: Սա հայրենական պատերազմ է: Ուզում եմ նորից ընդգծել, պէտք է հաւատալ, ես հաւատում եմ: Մենք յաղթելու ենք», յայտնեց Արայիկ Յարութիւնեան:
Աւելի ուշ ան յայտարարեց, որ արհեստավարժ զինուորականներու, ժամկէտայիններու եւ աշխարհազօրի սերտ փոխգործակցուած աշխատանքը եւ կողք կողքի ճիշդ գործելու ունակութիւնը օրական դրութեամբ կը դրսեւորուի նոր սխրանքներով:
«Ամէն անգամ առաջնագծից վերադառնում եմ նոր ու թարմացուած ուժերով: Մեր տղաների մարտական ոգին ու տրամադրուածութիւնը յաղթանակի հանդէպ միայն մեծ վստահութիւն են ներշնչում: Արհեստավարժ զինուորականների, ժամկէտայինների եւ աշխարհազօրի սերտ փոխգործակցուած աշխատանքն ու կողք կողքի ճիշդ գործելու ունակութիւնն ամէն օր արտայայտւում են նոր սխրանքներով: Եւ այսօր շատ կարեւոր է, որպէսզի նրանց ոգեւորութիւնն ու վճռականութիւնը վարակիչ դառնան նաեւ թիկունքում գտնուողների համար: Թշնամու դէմ արդիւնաւէտ պայքար մղելու եւ յաղթանակի հասնելու բոլորիս հաւաքական ցանկութիւնը կարող ենք կեանքի կոչել մեր ուժերի նկատմամբ անվերապահ հաւատի ու միասնական ջանքերի շնորհիւ», ըսաւ Յարութիւնեան: