«Իշխող խմբակի համար ակնյայտ է, որ առանց քաղաքական հետապնդումների իրենք զրկուած են վերարտադրուելու հնարաւորութիւնից»

 ՀՅԴ Հայաստանի Գերագոյն մարմինը Սիւնիքի մէջ տեղի ունեցած վերջին իրադարձութիւններուն վերաբերեալ հրապարակեց հետեւեալ յայտարարութիւնը.

«Հայաստանի վարչապետի պաշտօնը զբաղեցնող անձը Սիւնիքի մարզում արժանացաւ համատարած մերժման, որին յաջորդեց հաւասարակշռութիւնը կորցրած անձի յայտնի ապօրինի յանձնարարականը իրաւապահ մարմիններին: Մարդու իրաւունքների ակնյայտ խախտումներով եւ արժանապատուութեան ոտնահարմամբ բերման ենթարկուեցին տասնեակ քաղաքացիներ: Իշխող խմբակցութեան մի շարք պատգամաւորներ, արդարացնելով իրաւապահ մարմինների այս գործելակերպը, անուղղակիօրէն հաստատեցին, որ այն թելադրուած է եւ իրականացւում է իրենց վարչախմբի գիտութեամբ ու անմիջական յանձնարարութեամբ:

«Ի պաշտպանութիւն արժանապատիւ սիւնեցիների, ձերբակալուածներին անյապաղ ազատ արձակելու, նրանց կտտանքի ենթարկելու դէպքերի առիթով քրէական գործեր յարուցելու պահանջներով Երեւանում` Գլխաւոր դատախազութեան շէնքի դիմաց, անցկացուեց բազմամարդ քաղաքական հրատապ ակցիա: Գլխաւոր դատախազից այս հարցով պարզաբանումներ ստանալու` քաղաքացիների պահանջը ոչ միայն անտեսուեց, այլեւ ոստիկանութիւնն իր յարձակողական գործողութիւններով, անգամ` մարմնական վնաս հասցնելով, բերման ենթարկեց տասից աւելի անձանց:

«Իրաւապահ մարմինների յանցաւոր վարքագիծը ստիպում է արժանապատիւ քաղաքացիներին` սեփական ուժերով պաշտպանել իրենց իրաւունքները: Ոստիկանութիւնը վերածուել է իշխանութեան եւ յատկապէս վարչապետի աթոռին կառչած անձի քաղաքական պատուէրն ու ապօրինի հրահանգներն իրականացնող պատժական գործիքի: Ակնյայտ է, որ քննչական մարմիններն ու դատախազութիւնը ստանձնել են իշխանութեան յանցագործութիւններն օրինականացնելու անպատուաբեր դերակատարութիւնը: Վերջին ժամանակաշրջանում Երեւանում եւ մարզերում նկատելի է ՀՅԴ կառոյցի թիրախաւորումը: Քաղաքական հետապնդումները կրում են շարունակական բնոյթ:

«Իշխող խմբակի համար այլեւս ակնյայտ է, որ առանց բռնութիւնների ու քաղաքական հետապնդումների իրենք զրկուած են վերարտադրուելու` նոյնիսկ նուազագոյն հնարաւորութիւնից:

«Ըստ այդմ` դիմում ենք իրաւապահ մարմիններին եւ պահանջում մնալ բացառապէս օրէնքով իրենց վերապահուած լիազօրութիւնների սահմաններում, չարժեզրկել պետական ինստիտուտները, չդառնալ օրուայ իշխանութիւնների քաղաքական կամակատարը, ծառայել Հայաստանի Հանրապետութեանն ու քաղաքացու օրինական շահերին, հակառակ դէպքում`օրէնքի ողջ խստութեամբ կ՛ենթարկուէք պատասխանատուութեան:

«Այս պահանջը բարձրաձայնելու համար 2021թ. Ապրիլի 29ին` ժամը 17:00ին, բոլոր արժանապատիւ քաղաքացիներին հրաւիրում ենք մասնակցելու բողոքի ակցիայի` դատախազութեան շէնքի առջեւ»:

Leave a Comment

You must be logged in to post a comment.