Իշխան Սաղաթէլեան. «Արցախը Երբեք Չի Կրնար Ըլլալ Ազրպէյճանի Մաս, Ասիկա Բացառուած Է»

«Մեր մտահոգութիւնները Արցախի եւ Հայաստանի մէջ տիրող իրավիճակներու շուրջ չեն փարատած»: Այս մասին խորհրդարանին մէջ լրագրողներուն հետ զրոյցի մը ընթացքին ըսաւ ազգային ժողովի փոխնախագահ Իշխան Սաղաթէլեան` անդրադառնալով խորհրդարանին մէջ սահմանային իրավիճակին շուրջ փակ քննարկումին:

Իշխան Աաղաթէլեան ընդգծեց, որ իրենց մտահոգութիւնները պայմանաւորուած են սահմանային իրավիճակի լարուածութեամբ:

«Արդէն քանի ամիս է, թշնամին երկու ուղղութիւններով ներխուժած է Հայաստանի սահմաններէն ներս, այս ժամանակահատուածին մէջ ունեցած ենք գերիներ, զոհեր, երէկ եւս զոհեր ունեցանք: Այս բոլորին հետ կապուած` «Հայաստան» խմբակցութիւնը պահանջած էր հանդիպում, որ տեղի ունեցաւ: Պարզապէս անիկա տեղի ունեցաւ փակ գաղտնի պայմաններու մէջ, շատ բաներ չեմ կրնար ըսել: Ինչ կը վերաբերի մեր մտահոգութիւններուն, անոնք չեն կրնար փարատիլ, որովհետեւ գրեթէ ամէն օր կ՛ունենանք զոհեր, կրակոցներ, եւ թշնամին կը շարունակէ մնալ Հայաստանի Հանրապետութեան տարածքին մէջ», նշեց Իշխան Սաղաթէլեան:

Ըստ ազգային ժողովի փոխնախագահին, քննարկման ժամանակ հնչեցուցած են բազմաթիւ հարցեր, որոնց պատասխանները ստացած են, մէկ մասը եղած է տեղեկատուական, որոշ հարցեր ալ հասկնալի պատճառներով չեն մեկնաբանուած:

«Կը կարծեմ` նման հանդիպումներու անհրաժեշտութիւն միշտ կայ, աւելի բարձր մակարդակով պէտք է ըլլան այս հանդիպումները: Մեր մնացած բոլոր մտահոգութիւնները` Արցախի եւ Հայաստանի սահմաններուն վրայ տիրող իրավիճակին վերաբերեալ, չեն փարատած», շեշտեց ան:

Ինչ կը վերաբերի Ալիեւի յայտարարութեան` Ազրպէյճանի «տարածքային ամբողջականութեան» ճանաչման դիմաց` Հայաստանի հետ խաղաղութեան համաձայնագիրի ստորագրման մասին` Իշխան Սաղաթէլեան ըսաւ, որ փակ քննարկման ժամանակ այդ հարցը չեն քննարկած:

«Արցախը երբեք չի կրնար ըլլալ Ազրպէյճանի մաս, ասիկա բացառուած է: Բնականաբար, օգտուելով իրավիճակէն, թշնամի երկրի ղեկավարը պիտի փորձէ ճնշումներու միջոցով հասնիլ իր ուզածին: Թշնամիին ուզածն ու նպատակը ակնյայտ են, հարցը այն է, թէ մենք ի՛նչ կ՛ուզենք, ինչպէ՛ս այդ բոլորին կը պատրաստուինք, ինչպէ՛ս կը դիմագրաւենք, ի՛նչ քայլերու կը ձեռնարկենք, սեղանին վրայ ի՛նչ փաթեթ դրուած է, ո՛րն է մեր տեսակէտը եւ այլն», նշեց Ազգային ժողովի փոխնախագահը:

Leave a Comment

You must be logged in to post a comment.