Ստեփանաւանի մէջ եւս 10 ձերբակալութիւն. «Ուժեղ Հայաստան» կը դատապարտէ իշխանութիւններուն գործողութիւնները
- (0)
ԵՐԵՒԱՆ.- Հայաստանի հակափտածութեան կոմիտէն հոկտեմբեր 23-ին յայտնած է, որ Ստեփանաւանի մէջ ընտրակաշառքի գործով ձերբակալուած է եւս 10 անձ՝ գործով մեղադրեալներուն ընդհանուր թիւը հասցնելով 24-ի։
Ձերբակալութիւնները տեղի կ՚ունենան հոկտեմբեր 25-ին նախատեսուած տեղական ինքնակառավարման մարմիններու ընտրութիւններէն ընդամէնը երկու օր առաջ։
Հոկտեմբեր 21-ին իրաւապահ մարմինները ձերբակալած էին 14 անձեր, ներառեալ ընդդիմադիր «Ուժեղ Հայաստան» կուսակցութեան Ստեփանաւանի համայնքապետի թեկնածու Արսէն Գէորգեանը եւ անոր աջակիցները։
Քննչական մարմինները կը պնդեն, որ մեղադրեալները մասնակցած են ընտրակաշառք տալու, ստանալու եւ այդ գործընթացին օժանդակելու գործողութիւններու։ Հրապարակուած են նաեւ գաղտնի նկարահանուած տեսանիւթեր, որոնք, իշխանութիւններուն համաձայն, կը հիմնաւորեն առաջադրուած մեղադրանքները։
«Ուժեղ Հայաստան» կուսակցութիւնը վճռականօրէն մերժած է մեղադրանքները՝ իշխանութիւններուն գործողութիւնները որակելով քաղաքական հետապնդում եւ ընտրական գործընթացին միջամտութիւն։
Հոկտեմբեր 23-ին հրապարակուած յայտարարութեամբ կուսակցութիւնը մասնաւորաբար մտահոգութիւն յայտնած է Ստեփանաւանի իր նախընտրական կեդրոնին մէջ կատարուած գաղտնի հսկողութեան եւ ձեռք բերուած տեսանիւթերու հրապարակման առնչութեամբ։
Ընդդիմադիր ուժը կը պնդէ, որ նման գործողութիւնները կը խախտեն անմեղութեան կանխավարկածը եւ ընտրութիւններէն անմիջապէս առաջ կը վնասեն իր թեկնածուին քաղաքական հեղինակութեան։
Կուսակցութիւնը միաժամանակ շեշտած է, որ ընտրակաշառքի հաստատուած դէպքերը պէտք է հետապնդուին օրէնքով, սակայն անընդունելի են ընտրովի արդարադատութիւնը եւ իրաւապահ կառոյցներու օգտագործումը քաղաքական մրցակցութեան մէջ։
Ստեփանաւանի զարգացումները նոր մտահոգութիւններ յառաջացուցած են Հայաստանի մէջ ընտրութիւններու արդարութեան, ընդդիմադիր ուժերու նկատմամբ պետական ճնշումներու եւ իրաւապահ մարմիններու անաչառութեան շուրջ։
