Այս Տարուան «Հրանդ Տինք» Մրցանակները Յանձնուած Են Կնոջական Դատերու Պաշտպաններու
«Հրանդ Տինք» միջազգային մրցանակներու յանձնումի արարողութիւնը, ինչպէս ամէն տարի, այս տարի եւս տեղի ունեցաւ Պոլսոյ «Ճեմալ Ռեշիտ Ռէյ» հեղինակաւոր համերգասրահին մէջ` 15 սեպտեմբերին, լրագրողի ծննդեան օրը:
Հիմնարկին անունով ներկաներուն ողջոյնի խօսքը արտասանեց «Հրանդ Տինք հիմնարկ»-ի նախագահ Ռաքէլ Տինք: Ան ընդգծեց, որ աշխարհին այսօր բաժին ինկած աղէտալի վիճակէն միակ ելքն է հեռու մնալը այն գործիչներէն, որոնք բռնութիւն կը քարոզեն, եւ կոչ ըրած է զգօն գտնուելու այն մարդոց հանդէպ, որոնք բռնութեան մասին կը խօսին: Ան շեշտեց, որ կեանքի իրաւունքը բռնութիւն չէ, այլ` բազմազանութիւն:
Այնուհետեւ տեսանիւթով մը ներկայացուեցաւ 2024-ի «Լոյսեր»-ը, ուր յղուած էին պատգամներ, ողջունուած` անհատներ եւ կազմակերպութիւններ, որոնք լոյս կը սփռեն մարդկութեան վրայ, կը պայքարին մարդոց բարօրութեան եւ իրաւունքներուն համար, բայց նաեւ` ի խնդիր շրջակայ միջավայրի, անասուններու պաշտպանութեան: Այս տարուան «Լոյսեր»-ու բովանդակութիւնը կազմած էին` կնոջական իրաւունքները, ցեղապաշտութեան ու սեռային բռնաճնշումներու դէմ պայքարը, անարդարութիւնն ու չքաւորութիւնը:
2024-ի «Հրանդ Տինք» մրցանակի դափնեկիր դարձաւ Թուրքիայէն` «Մանիշակագոյն երդիք» կիներու ապաստարանը, որ տարիներէ ի վեր վճռականօրէն կը պայքարի կիներու նկատմամբ բռնութեան դէմ եւ ի խնդիր անոնց հաւասար իրաւունքներուն:
Իսկ արտասահմանէն դափնեկիր հռչակուեցաւ Սիերա Լէոնէէն Ռուճիաթու Նենեհ Թուրայ, որ հակառակ բոլոր դժուարութիւններուն` երկար տարիներէ ի վեր խիզախօրէն կը պայքարի աղջիկներու եւ կիներու սեռային գործարաններու խեղման դէմ:
Ձեռնարկին ընթացքին անդրադարձ կատարուեցաւ, որ եթէ Հրանդ Տինք ողջ ըլլար, պիտի նշէր իր 70-ամեակը:
Հանդիսութեան աւարտին կազմակերպիչները անգամ մը եւս հաստատեցին, որ մրցանակը կը շնորհուի անհատներու, հաստատութիւններու կամ խումբերու, որոնք կ՛ոգեշնչեն եւ յոյս կը ներշնչեն մարդոց շարունակելու պայքարը` աւելի ազատ ու արդար աշխարհի մը համար, մարդոց, որոնք կը կոտրեն կարծրատիպերը եւ կը գործածեն խաղաղութեան լեզուն:
Comments are closed.