«Հայաստան» Եւ «Պատիւ Ունեմ» Խմբակցութիւններու Յայտարարութիւն

2020 թուականի 44-օրեայ պատերազմի հանգամանքներն ուսումնասիրող Ազգային ժողովի քննիչ յանձնաժողովի յունիսի 20-ի նիստում Նիկոլ Փաշինեանի` նախապէս ազդարարուած մասնակցութեան եւ հրապարակային ցուցմունք տալու նախաձեռնութեան առիթով, վերաշարադրելով ընդդիմութեան նախկինում հրապարակած դիրքորոշման փաստարկները, վերահաստատում ենք.

1.- Քննիչ յանձնաժողովի ձեւաւորումն ինքնին իշխանական մեծամասնութեան կողմից չի կարող ապահովել անաչառութիւն, համապարփակութիւն, քանի որ իշխող ուժի` ճնշող մեծամասնութիւն ունեցող յանձնաժողովն ի զօրու չէ առարկայական քննել սեփական իշխանութեան, կառավարութեան գործունէութիւնը:

2.- Քննիչ յանձնաժողովները ձեւաւորւում եւ ձեւաւորուել են կա՛մ ընդդիմութեան, կա՛մ խնդրոյ առարկայ հարցի շուրջ շահերի բախում չունեցող ուժի կողմից, ինչպէս եղաւ Ապրիլեան քառօրեայի հանգամանքներն ուսումնասիրելու պարագայում: Իշխանութիւնը քննութիւն անցկացնելու համար ունի վարչական, իրաւական, դատական բոլոր գործիքներն ու հնարաւորութիւնները:

3.- Համապարփակ, ամբողջական եւ հանրային վստահութիւն ունեցող, Ազգային ժողովից դուրս, համախոհութեամբ եւ համաչափութեամբ յանձնաժողով ձեւաւորելու համար ընդդիմութիւնը հանդէս էր եկել նոր որակի եւ կառուցուածքի քննիչ յանձնաժողով ձեւաւորելու նպատակով օրէնսդրական նախաձեռնութեամբ, որն էլ մերժուեց իշխանութիւնների կողմից:

4.- Նախապէս յայտարարուած Փաշինեանի հրապարակային, ուղիղ եթերում ցուցմունք տալու նախաձեռնութիւնը, որեւէ կերպ չի նպաստելու 44-օրեայ պատերազմի հանգամանքներն ուսումնասիրելուն, քանի որ հրապարակային վկայութիւնների պարագայում, անհնար է լինելու պետական, ռազմական, դիւանագիտական գաղտնի տեղեկութիւնների հրապարակումը, կամ դրանց շուրջ հարցադրումների ներկայացումը:

5.- Փաշինեանի հրապարակային ցուցմունք տալու նախաձեռնութիւնը, շտապողականութիւնը պայմանաւորուած է քաղաքական շահարկումների նպատակով ձեւաւորուած եւ ժամկէտները երկարաձգած քննիչ յանձնաժողովի գործունէութեան ժամկէտի աւարտով եւ ծառայելու է իշխանութեանը, քաղաքական մեծամասնութեանն ու անձամբ Փաշինեանի վրայից քաղաքական պատասխանատուութիւնը հեռացնելու նպատակին:

6.- Մէկ հարցաքննուողի համար բացառութիւն անելու դէպքում քննիչ յանձնաժողովը հաւասարութեան համար պարտաւոր է հրապարակել բոլոր հարցաքննութեան ենթարկուածների ցուցմունքներն ու պատասխանները: Հակառակ պարագայում ստեղծւում են անհաւասար պայմաններ եւ քննիչ յանձնաժողովը լինելու է Փաշինեանի քաղաքական թիրախաւորումների, «մեղաւորներ» նշանակելու հարթակ:

Առ այդ, այս եւ նախկինում հրապարակուած մեր հիմնաւորումների, ինչպէս նաեւ նախկինում քննիչ յանձնաժողովի նիստերին պատգամաւորների կողմից հարցեր տալու ծաւալների սահմանափակումների, իշխանութեան եւ անձամբ Փաշինեանի կողմից հետեւողականօրէն իր վրայից պատասխանատուութիւնը գցելու, պարբերաբար տարատեսակ մեղաւորներ կարգելու գործելաոճը հաշուի առնելով, ընդդիմադիր պատգամաւորները չեն մասնակցի այդ շոյին:

ԱԶԳԱՅԻՆ ԺՈՂՈՎԻ «ՀԱՅԱՍՏԱՆ» ԽՄԲԱԿՑՈՒԹԻՒՆ
ԱԶԳԱՅԻՆ ԺՈՂՈՎԻ «ՊԱՏԻՒ ՈՒՆԵՄ» ԽՄԲԱԿՑՈՒԹԻՒՆ

19 յունիս 2023