Համակիրներու Երթ` Հայաստան – Փորթուգալ Մրցումէն Առաջ

Շաբաթ, 13 յունիսին, Եուրօ-2016-ի ֆութպոլի ախոյեանութեան զտումի մրցաշարքին ծիրին մէջ, Երեւանի ժամանակացոյցով ժամը 20:00-ին, Հանրապետական մարզադաշտին վրայ, Հայաստանի ֆութպոլի ազգային հաւաքականը պիտի հիւրընկալէ Փորթուգալը:

Հայաստանի հաւաքականի համակիրներու «ՖԱՖ» շարժումը առաջարկած է մրցումէն առաջ մասնակցիլ միասնական երթի:

Շարժումին հրապարակած յայտարարութեան մէջ նշուած է. «Հայաստանի հաւաքականին բոլոր համակիրները (պայման չէ, որ տոմս գնած ըլլան) կը հրաւիրենք 13 յունիսին, ժամը 16:30-ին, ֆրանսական հրապարակին կից, Ֆիլհարմոնիային առջեւ գտնուող Արամ Խաչատրեանի յուշարձանին մօտ մասնակցելու համակիրներուն միասնական մեծ երթին, դէպի` մարզադաշտ:

«Բոլորին կոչ կ՛ուղղենք գալու ազգային հաւաքականի մարզաշապիկներով, իսկ ան որ չունի, կրնայ հագուիլ կարմիր շապիկ` մարզադաշտին թրիպիւնները կարմիր ներկելու համար:

«Եռագոյն վզկապերու ներկայութիւնը փափաքելի պիտի ըլլայ: Երթին ընթացքին պայթուցիկ նիւթեր պիտի արձակենք դէպի երկինք, իսկ բոլոր փափաքողները, մեր օգնութեամբ, իրենց դէմքերը կրնան ներկել Եռագոյն գոյներով»: