Մահէն 70 տարի ետք Զօրավար Սեպուհի աճիւնները հանգչեցան Մայր Հայրենիքին մէջ
(Լուսանկարները՝ Գաբրիէլ Փանոսեանի)
ՀՀ պաշտպանութեան նախարարութեան նախաձեռնութեամբ, Նոյեմբեր 20-ին Հայաստան տեղափոխուեցաւ 19-րդ դարավերջի և 20-րդ դարասկիզբի հայ ժողովուրդի մղած ազգային ազատագրական պայքարի, ապա Հայաստանի Առաջին Հանրապետութեան բանակի կայացման նուիրեալ, ռազմական ու պետական գործիչ, Հայ Յեղափոխական Դաշնակցութեան անդամ Զօրավար Սեպուհի՝ Արշակ Ներսիսեանի աճիւնասափորը, որ ամփոփուեցաւ Եռաբլուրի մէջ: Յուղարկաւորութեան արարողութեան մասնակից էր ՀՀ Պաշտպանութեան նախարար Սէյրան Օհանեան։
Զօրավար Սեպուհ՝ Արշակ Ներսիսեան, Էրզրումի նահանգի Բաբերդի գաւառէն էր: Առաջին համաշխարհային պատերազմին կը միանայ հայ կամաւորկան շարժման ու կը մասնակցի Կովկասեան ճակատի կռիւներուն որպէս հայ կամաւորական առաջին գունդի հրամանատար: 1918-ին կը մասնակցի Սարդարապատի ճակատամարտին։ Օգնութեան կը հասնի Պաքուի մէջ կռուող հայկական ուժերուն: Սեբաստացի Մուրատի հետ կը ստեղծէ հիմնադրամ, որուն նպատակն էր նիւթական օգնութիւն ցուցաբերել ցեղասպանութեան հետևանքով գաղթական դարձած հայ ընտանիքներուն:
Եղած է Հայաստանի առաջին հանրապետութեան խորհրդարանի անդամ: Հայաստանի խորհրդայնացումէն ետք կը հաստատուի Միացեալ նահանգներ , ուր կը մահանայ 1940-ին: Մահէն առաջ, կը գրէ իր կտակը, ուր կը յայտնէ իր փափաքը՝ մահէն ետք հրկիզել մարմինը եւ աճիւնը տեղափոխել Հայաստան: 75 տարի ետք զօրավարի փափաքը իրականացաւ:
