«Ես Օր Մը Անպայման Կու Գամ Ու Կը Մնա՛մ Հայաստան». Սեդա Մխիթարեան, «Արի տուն-2017»ի մասնակից

Մեկնարկեց ՀՀ Սփիւռքի նախարարութեան «Արի տուն-2017» ծրագիրը, որուն ծիրէն ներս  աշխարհի տարբեր երկիրներէ Հայաստան ժամանած հայ աղջիկներն ու պատանիները այցելեցին Սփիւռքի նախարարութիւն, ուր  անոնց  բարեմաղթանքի ոգեւորիչ խօսքերով ողջունեց Սփիւռքի նախարար Հրանոյշ Յակոբեան: Ծրագիրի մասնակիցներէն երկուքին հետ «Հայերն այսօր»-ին համար ծաւալած փոքրիկ հարցազրոյցներուն  ընթացքին  անհնար էր չնկատել  երեխաներու  յուզմունքը, կարօտը, Հայաստանի տեսարժան վայրեր այցելելու անհամբերութիւնը:

Սեդա Մխիթարեան, 18 տարեկան, ՌԴ, Նովոսիպիրսկ

-Ես ծնած եմ Հայաստան: Երեք տարեկան  եղած եմ, երբ մեր ընտանիքը տեղափոխուած է Ռուսաստան: 15 տարի անց կրկին Հայրենիքի մէջ  եմ` իմ ծննդավայրս. շատ յուզուած եմ: Դուրսը ապրելով հանդերձ` շարունակ  երազած եմ գալ Հայաստան, տեղափոխուիլ մեր երկիր: Մեր ընտանիքը հայախօս է, մայրս ուսուցչուհի է տեղի  կիրակնօրեայ հայկական դպրոցին մէջ, ես ալ կը յաճախեմ այդ դպրոցը:  «Արի տուն» ծրագիրին մասին շատ լսած եմ մեր համայնքին մէջ, եւ ահա, այս տարի, որոշեցի մասնակցիլ: Հիւրընկալուած եմ  շատ ջերմ, հիւրընկալ հայկական ընտանիքի մը մէջ: Շատ հետաքրքրուած եմ Գառնիի տաճարով. կ’ուզէի ամէնէն առաջ այցելել այնտեղ: Ես պատմութիւն շատ կը սիրեմ, կարդացած եմ մեր պատմութեան բարդ ու տառապանքներով լեցուն, նաեւ` յաղթական էջերը: Ինծի շատ կը հետաքրքրեն  ճարտարապետական հինաւուրց կոթողները:  Կ’ուսանիմ Նովոսիպիրսկի պետական մանկավարժական ինստիտուտին մէջ` լրագրողի մասնագիտութեամբ, կ’աշխատիմ ձեռք բերել հնարաւորինս  լաւ գիտելիքներ եւ հմտութիւն` յետագային իմ լրագրողական աշխատանքով աշխարհին ներկայացնել Հայաստանն ու հայ մեծերը: Այն Հայաստանը, որուն մասին կարդացած եմ գիրքերու մէջ, որուն ծանօթացած եմ ֆիլմերու միջոցով, այսօր  իր դրախտային դռները բացած է առջեւս. երջանիկ եմ, որ սեփական աչքերով կը տեսնեմ ու կը զգամ Հայաստանը:  Ես օր մը անպայման կու գամ ու կը մնա՛մ Հայրենիքի մէջ:

Տիգրան Սաղումեան, 15 տարեկան, Ղազախստան, Ատրաու

-Առաջին անգամ, երբ լսեցի այս ծրագիրին մասին, անհամբեր կը սպասէի, որ իմ տարիքս համապատասխանէ մասնակցութեան անհրաժեշտ չափանիշներուն, որպէսզի ընդգրկուիմ այդ ձեռնարկներուն: Հիմա շատ ուրախ եմ, որ ծրագիրին մասնակից եմ արդէն: «Արի տան» մասին լսած եմ հեռուստատեսութեամբ, ընկերներէս:  Հայաստան յաճախ կու գամ. Վանաձորի մէջ   կ’ապրին  իմ պապիկս ու տատիկս, մօրաքոյրներս: Հայաստանի մէջ շատ լաւ ընկերներ ունիմ, յոյսով եմ, որ այս ծրագիրի ծիրէն ներս եւս լաւ ընկերներ ձեռք կը բերեմ:

Զրուցեց  Կարինէ Աւագեան