Ռիօ-2016. Արթուր Ալեքսանեան` Ոսկի Մետալակիր. Սիմոն Մարտիրոսեան Հայաստանի Ապահովեց Առաջին Մետալը
Արթուր Ալեքսանեան պարգեւատրման ընթացքին, հագած` ապրիլեան քառօրեայ պատերազմի հերոսներէն Ռոպերթ Ապաճեանի նկարով շապիկը:
Պրազիլի մէջ տեղի ունեցող Ռիօ-2016-ի ամառնային 31-րդ ողիմպիականի խաղերուն 10-րդ օրը, ի վերջոյ Հայաստան տիրացաւ իր առաջին մետալին, այդ ալ շնորհիւ Սիմոն Մարտիրոսեանի, որ ծանրաբարձութեան 105 քկ դասակարգին մէջ տիրացաւ արծաթ մետալին:
Ապա Հայաստանի համար երկրորդ արծաթ մետալը ապահովեց յունահռոմէական ոճի ըմբիշ Միհրան Յարութիւնեան (66 քկ):
Սակայն, ի վերջոյ, Արթուր Ալեքսանեան տիրացաւ ոսկի մետալին, երբ աւարտականին յաղթեց (յունահռոմէական ոճի ըմբշամարտ, 98 քկ) քուպացի իր մրցակիցին` 3-0 արդիւնքով:
Արթուր Ալեքսանեան Հայաստանի Ապահովեց Ոսկի Մետալ Մը…
20 Տարի Սպասումէ Ետք
Ռիօ-2016-ի յունահռոմէական ոճի ըմբշամարտի կիսաւարտականին իր կատարած ճակատումին, 98 քկ-ի մրցումներուն մասնակցող հայրենի ըմբիշ Արթուր Ալեքսանեան բաւական տպաւորիչ յաղթանակ մը արձանագրեց, երբ 9-0 արդիւնքով ջախջախեց իր թուրք մրցակից Ճենք Իլտեմը:
Ինչ կը վերաբերի քառորդ աւարտականին իր արձանագրած յաղթանակին, Ալեքսանեան 8-0 արդիւնքով պարտութեան մատնեց ռումանացի Ալեքսուս Ցիուրարիուն:
Հասնելով աւարտական հանգրուան` Ալեքսանեան իր դէմ ունէր քուպացի Տանիել Լուկօ Քապրերան:
Երէկ ուշ գիշերին Արթուր Ալեքսանեան Հայաստանի ապահովեց առաջին ոսկի մետալը` 3-0 արդիւնքով յաղթելով իր մրցակիցին:
Նշենք, որ Հայաստան վերջին անգամ 1996-ին էր, որ ոսկի մետալի տիրացած էր, երբ Աթլանթայի մէջ Արմէն Նազարեան յունահռոմէական ոճի ըմբշամարտի 52 քկ դասակարգին մէջ յաղթական հռչակուած էր: