Միհրան Յարութիւնեան Յաղթեց Ազրպէյճանցի Իր Մրցակիցին, Բայց Պարտուեցաւ Աւարտականին

Պրազիլի մէջ տեղի ունեցող ողիմպիական խաղերու յունահռոմէական ոճի 66 քկ դասակարգի մրցումներուն մասնակցող հայրենի ըմբիշ Միհրան Յարութիւնեան ճակատեցաւ ազրպէյճանցի Ռասուլ Չունայեւի դէմ:

Յարութիւնեան առաջին հանգրուանին փայլուն յաղթանակ արձանագրելով 4-0 արդիւնքով ջախջախեց իր մրցակիցը:

Երկրորդին, թէեւ ազրպէյճանցի ըմբիշը հաւասարեցուց արդիւնքը, սակայն երրորդ եւ վճռորոշ հանգրուանին հայրենի ըմբիշը 4-1 արդիւնքով յաղթանակ մը արձանագրելով դուրս ձգեց ազրպէյճանցի իր մրցակիցը եւ հասաւ աւարտականին:

Նշենք, որ Յարութիւնեան քառորդ աւարտականին եւս արձանագրեց տպաւորիչ յաղթանակ, երբ 2-1 արդիւնքով պարտութեան մատնեց աշխարհի նախկին ախոյեանը` հարաւային քորէացի Հանսու Ռիուն:

Դժբախտաբար սակայն, Յարութիւնեան չկրցաւ տիրանալ ոսկի մետալին, երբ ճակատեցաւ սերպ Տաւոր Շթեֆանեքի դէմ:

Աւարտական այս ճակատումը վերջ գտաւ 1-1 արդիւնքով, սակայն յաղթանակը շնորհուեցաւ սերպ ըմբիշին, որովհետեւ ան յաջողած էր արդիւնքը հաւասարեցնել:

Պէտք է ըսել, որ հայրենի ըմբիշը պարտուեցաւ իրաւարարներուն անհասկնալի որոշումին պատճառով: