Հայկական Ցեղասպանութեան Ոգեկոչման Քէպէքի Միացեալ Մարմնի Կոչը
ՍՐՏԱԳԻՆ ԿՈՉ ՄԵՐ ԺՈՂՈՎՈՒՐԴԻՆ
Սիրելի հայրենակիցներ.
Գոհունակութեամբ կը տեղեկացնենք թէ համագործակցութեան այն ոգին, որու միջոցաւ մեծ յաջողութեամբ իրագործուեցան Հայոց Ցեղասպանութեան 100-ամեակի նշումներու շարքը Գանատայի տարածքին, կը քաջալերէ մեզ որ նոյն ոգիով եւ համաժողովրդական մակարդակով շարունակենք նշել Ցեղասպանութեան 101-րդ տարեդարձը, արժանավայել կերպով յարգելու մեր նահատակներու անմոռաց յիշատակը եւ հաստատելու մեր արդար պահանջատիրութեան եւ հաւաքական աննկուն կամքը:
Այդ նպատակաւ նախնական քայլերը առնուած են ու կազմուած է Միացեալ Յանձնախումբ մը, համագաղութային տարողութեամբ ընթացք տալու միացեալ ձեռնարկներու կազմակերպութեան, սկսելով յառաջիկայ Ապրիլեան նշումներու շարքէն: Այս գործակցութիւնը պիտի ստանայ մնայուն բնոյթ ամբողջ տարուան ընթացքին համագաղութային չափանիշով նշելու համար համազգային տարողութեամբ միջոցառումներ:
Միասնականութեան նախընթացը որ ստեղծուեցաւ վերջին շրջանին Գանատայի հայ գաղթօճախի տարածքին եւ որ հետզհետէ յաւելեալ թափով կը ծաւալի, վստահ ենք թէ պիտի արժանանայ մեր ժողովուրդի բարձր համարումին ու քաջալերութեան:
Յարգանքներով՝
Հայկական Ցեղասպանութեան Ոգեկոչման Քէպէքի Միացեալ Մարմին
Մոնթրէալ