Ըմբշամարտ. Արայիկ Բաղդադեան Հրապարակեց Հայաստանի Հաւաքականին Կազմը
Հայաստանի ըմբշամարտի ազատ ոճի հաւաքականի գլխաւոր մարզիչ Արայիկ Բաղդադեան Հայաստանի ազգային ողիմպիական կոմիտէի կայքին հետ իր ունեցած հարցազրոյցին ընթացքին ներկայացուց Եւրոպայի ախոյեանութեան մասնակցող Հայաստանի հաւաքականին կազմը:
Ռիկայի մէջ (Լաթվիա) տեղի ունենալիք այդ ախոյեանութեան (8-13 մարտ) Հայաստանը պիտի ներկայացնեն Գարիկ Բարսեղեան (57 քկ), Վոլոդիա Ֆրանգուլեան (61 քկ), Դաւիթ Սաֆարեան (70 քկ), Գրիգոր Գրիգորեան (74 քկ), Շամիր Աթեան (86 քկ), Անդրանիկ Գալստեան (97 քկ) եւ Լեւան Բերիանիցէ (125 քկ):
«Նկատի ունենալով, որ ողիմպիական խաղերու տարի է եւ մեր դիմաց կան վարկանշային մրցաշարքեր, որոշեցինք այս կազմով մեկնիլ Ռիկա: Մեզի համար վարկանշային մրցաշարքերը աւելի կարեւոր են: Նախքան Լաթվիա մեր մեկնումը, նախապատրաստական հաւաք մը եւս կ՛ունենանք, այս անգամ Պիելոռուսիոյ մէջ: Խումբին հետ պիտի ըլլան նաեւ Վալտեր Մարգարեան, Վարուժան Կաջոյեան, Էդգար Ենոքեան եւ Մուսա Մուրթազալիեւ, որոնք կը շարունակեն նախապատրաստուիլ վարկանշային մրցաշարքերուն», ըսաւ Բաղդադեան: