Թուրքիոյ ընտրութիւններ. Կարօ Փայլան, Սելինա Տողան, Մարգար Եսայեան վերստին թեկնածու

«Արմէնփրես» կը հաղորդէ, որ Թուրքիոյ մէջ տեղի ունենալիք արտակարգ խորհրդարանական ընտրութիւններէն առաջ Թուրքիոյ կուսակցութիւնները հրապարակած են իրենց կողմէ յառաջադրուելիք ընտրական ցուցակները:

Իշխող Արդարութիւն եւ բարգաւաճում կուսակցութիւնը, Հանրապետական ժողովուրդի կուսակցութիւնն ու Ժողովուրդներու ժողովրդավարական կուսակցութիւնը դարձեալ առաջադրած են 7 յուլիսի ընտրութիւններուն ընթացքին ընտրուած իրենց հայ թեկնածուները:

Իշխող կուսակցութեան կողմէ առաջադրուած թեկնածուն է պոլսահայ լրագրող, գրող Մարգար Եսայեան, որ ժամանակին վարած է նաեւ «Թարաֆ» օրաթերթի գլխաւոր խմբագիրի պաշտօնը: Հանրապետական ժողովուրդի կուսակցութիւնը առաջադրած է պոլսահայ իրաւաբան Սելինա Օզուզուն Տողանի` Թուրքիոյ խորհրդարանի հայ առաջին կին անդամին թեկնածութիւնը: Քրտամէտ Ժողովուրդներու ժողովրդավարական կուսակցութիւնը առաջադրած է թեկնածութիւնը Կարապետ (Կարօ) Փայլանի, որ Պոլսոյ Եշիլքէօյ թաղամասին մէջ գտնուող հայկական դպրոցի տնօրէնն է եւ մեծ հեղինակութիւն կը վայելէ Պոլսոյ հայ համայնքին մէջ: