«Քոփա Ամերիքա». Չիլի Ապահովեց Աւարտականին Իր Տոմսը
«Քոփա Ամերիքա»-ի ֆութպոլի մրցաշարքի կիսաւարտական հանգրուանի առաջին ճակատումը, որ իրարու դէմ հանեց Չիլին եւ Փերուն, աւարտեցաւ հիւրընկալ երկրին` Չիլի յաղթանակով: Վերջինս 2-1 արդիւնքով պարտութեան մատնեց իր մրցակիցը: Էտուարտօ Վարկաս կերտեց Չիլիի յաղթանակը` նշանակելով 2 կոլ (42-րդ եւ 64-րդ): Փերուի կոլը նշանակեց անոր խմբակից Կերի Մետել` սխալմամբ իր բերդին մէջ (61-րդ):
Պէտք է նշել սակայն, որ Փերու, մրցումին մեծ մասը շարունակեց 10 մարզիկով, երբ Քարլոս Զամպրանօ 20-րդ վայրկեանին կարմիր քարտ մը ստացաւ:
Չիլի, որ ցարդ երբեք չէ տիրացած այս մրցաշարքին տիտղոսին, աւարտականին իր դէմ պիտի ունենայ Արժանթին-Փարակուէյ մրցումին յաղթանակը:
Իր կազմին արձանագրած այս յաղթանակէն ետք, Չիլիի մարզիչ Խորխէ Սամփաուլի ըսաւ, որ աւարտական հանգրուան հասնիլը եղաւ մեծ երազի մը իրականացումը: