Եւրոպական Խաղեր. Պաքու-2015. Հայրենի Կռփամարտիկները Եւս Հասան Պաքու. Միհրան Յարութիւնեան` Արծաթէ Մետալակիր

Մաքսիմ Մանուկեան (առաջին)

Պաքուի մէջ (Ազրպէյճան) տեղի ունեցող եւրոպական առաջին խաղերուն, յունահռոմէական ոճի ըմբշամարտի 85 քկ դասակարգի պայքարին մէջ ներգրաւուած Մաքսիմ Մանուկեան կը շարունակէ իր վստահ ելոյթները:

Մանուկեան 1-8-րդ հանգրուանին իր կատարած ճակատումին, 9-0 արդիւնքով ծանր պարտութեան մատնեց Ազրպէյճանը ներկայացնող Սաման Թահմասեպին:

Կիսաւարտականին Մանուկեան պարտուեցաւ եւ չկրցաւ պրոնզէ մետալի մը տիրանալ:

Միհրան Յարութիւնեան

Ռոման Ամոյեան

Իր կարգին, քառորդ աւարտականի իր տոմսը ապահովեց Միհրան Յարութիւնեան (66 քկ)` 1-8-րդ հանգրուանին յաղթելէ ետք Պուլկարիան ներկայացնող Սթաս Քոնսթանթինին: Կիսաւարտականին Յարութիւնեան 8-5 արդիւնքով յաղթեց ազրպէյճանցի Հասան Ալիեւին եւ հասաւ աւարտականին:

Եւրոպական առաջին խաղերուն ան այսպիսով աւարտական հասած առաջին հայ մարզիկը եղաւ: Սակայն աւարտականին ան 2-0 արդիւնքով պարտուելով Արտեմ Սուրքովէն (Ռուսիա), տիրացաւ արծաթ մետալին:

59 քկ դասակարգին մէջ, պրոնզէ մետալի պայքարին համար Ռոման Ամոյեան պարտուեցաւ ազրպէյճանցի Էլման Մուխթարովէն` 4-1 արդիւնքով:

Նոյն դասակարգին մէջ, Ռուսիան ներկայացնող Ստեփան Մարիանեան աւարտականին կը մրցի Սոսլան Տուրովի դէմ (Պիելոռուսիա):

Նշենք, որ 1-8-րդ հանգրուանին Ամոյեան պարտուեցաւ նոյնինքն Մարիանեանէն, որ կիսաւարտականին յաղթեց Մուխթարովին:

Նախորդ շաբաթավերջին եւրոպական Խաղերուն սկսելէն օր մը ետք, հայ կռփամարտիկները եւս մեկնեցան Պաքու` հետեւեալ կազմով.

Արտեոմ Ալեքսանեան (49 քկ), Նարեկ Աբգարեան (52 քկ), Արամ Աւագեան (56 քկ), Սամուէլ Բարսեղեան (60 քկ), Յովհաննէս Պաչքով (64 քկ) եւ Նիկոլ Արութիւնով (81 քկ), ինչպէս նաեւ մարզիչներ Կարէն Աղամալեան, Արման Յարութիւնեան եւ Վիաչեսլաւ Արութիւնով:

Հայ կռփամարտիկները Պաքուի մէջ իրենց ելոյթներուն պիտի սկսին 16 յունիսին, իսկ ազատ ոճի ըմբիշները` 17 յունիսին:

Անոնք նախքան մրցավայր մեկնիլը անցուցին ֆիզիքական եւ հոգեբանական բարձր պատրաստուածութիւն եւ պատրաստ եղան Պաքուի մէջ բարձր պահելու հայկական մարմնամարզի եւ Հայաստանի անունները:

Նշենք, որ Հայաստանի կռփամարտի ֆետերասիոնը մրցավայր ուղարկեց իր ամէնէն զօրաւոր մարզիկները եւ իւրաքանչիւր մարզիկէ մետալի ակնկալութիւն ունի: