Ամէն ինչ անելու ենք, որ, այո՛, այդ վերադարձը տեղի ունենայ. Իշխան Սաղաթէլեան
- (0)
Ամէն ինչ անելու ենք, որ, այո՛, այդ վերադարձը տեղի ունենայ. Իշխան Սաղաթէլեան
«Շատ կարեւոր է այսօր վերաիմաստաւորել, արժեւորել Շուշիի ազատագրման օրը եւ խորհուրդը։ 1992 թուականի Մայիսի 8-ին հայ ժողովուրդը, չնայած բոլոր դժուարութիւններին, կարողացաւ ազատագրել հայոց բերդաքաղաք Շուշին, որովհետեւ հաւատում էր իր բազկին, իր ուժին, իր կամքին, եւ միասնականութեամբ կարողացաւ այդ խնդիրը լուծել։ Այն բեկումնային նշանակութիւն ունեցաւ Արցախի ազատագրական պայքարի հարցում», այս մասին «Շուշի. Վերադարձ լինելու է» խորագրով միջացառումից առաջ ասաց ՀՅԴ Հայաստանի ԳՄ ներկայացուցիչ, ԱԺ «Հայաստան» խմբակցութեան պատգամաւոր Իշխան Սաղաթէլեանը։
Նրա խօսքով՝ որքան էլ շարունակուի Արցախի ուրացման քաղաքականութիւնը, որքան էլ Հայաստանի ներսի եւ դրսի թշնամիները փորձեն պարտադրել՝ հրաժարուել Արցախից, միեւնոյն է՝ չեն կարողանալու, որովհետեւ Արցախը հայկական է, եւ վերադարձի իրաւունքի համար անհրաժեշտ է պայքարել։
«Մենք վերադարձի իրաւունքն ամբողջութեամբ ունենք, միջազգային տարբեր ատեաններում այդ խնդիրը քննարկուել է, բարձրաձայնուել է, յստակ պէտք է արձանագրել, որ Արցախում տեղի է ունեցել ցեղասպանութիւն եւ էթնիկ զտում։ Արցախը մեր դարաւոր հայրենիքն է, եւ արցախահայերը վերադարձի իրաւունք ունեն։ Այսօր այդ իրաւունքի դէմ խօսում է երկու կառավարութիւն՝ Ատրպէյճանի կառավարութիւնը եւ Հայաստանի կառավարութիւնը, որտեղ Հայաստանի կառավարութիւնը չի առաջնորդւում հայ ժողովրդի հաւաքական իրաւունքների պաշտպանութեամբ, այլ, ընդհակառակը, իր վարած քաղաքականութիւնը հրաժարուել է այդ ամէնից»
Ըստ Իշխան Սաղաթէլեանի՝ որեւէ մէկը իրաւունք չունի այդ խնդիրը կամ հարցը փակելու։ «Եթէ որոշների համար Շուշին դժբախտ եւ դժգոյն քաղաք է, ապա մեզ համար Շուշին հայոց բերդաքաղաք է, եթէ որոշների համար Արցախ վերադարձը հայրենասիրական պաթոս է, ապա մեզ համար՝ ազգային նպատակ, որի համար պայքարելու ենք եւ ամէն ինչ անելու ենք, որ, այո՛, այդ վերադարձը տեղի ունենայ», ասաց նա։
Մանրամասները՝ տեսանիւթում.
