Յարութիւն Խաչատրեանի Ժապաւէնը Արժանացած Է Թուրին Միջազգային Փառատօնի Գլխաւոր Մրցանակին
ԵՐԵՒԱՆ, «Արմէնփրէս».– Շարժապատկերի բեմադրիչ Յարութիւն Խաչատրեանի «Անվերջ Փախուստ, Յաւերժ Վերադարձ» ֆիլմաշարի առաջին՝ «Հայկ. փախուստ» ժապաւէնը Թուրինի 33րդ միջազգային շարժապատկերի փառատօնին առժանացած է «Լաւագոյն վաւերագրական ֆիլմ» անուանակարգի գլխաւոր մրցանակին: Անկէ բացի, ժապաւէնը արժանացած է նաեւ հինգ հազար եուրօ պարգեւի։
«Հայկ. Փախուստ» ժապաւէնին հետ մրցումին ներկայացուած են նաեւ 10 այլ ժապաւէններ՝ Միացեալ Նահանգներէն, Պրազիլէն, Քանատայէն, Գերմանիայէն, Բրիտանիայէն, Սինկափուրէն, Պելճիքայէն, Սուրիայէն եւ Հայաստանէն։ Միջազգային դատական կազմին մէջ էր չեխ վաւերագրող Մարեք Հովորքա, գերմանացի բեմադրիչ Ֆրետ Կելեմենն ու ֆրանսացի շարժապատկերի քննադատ Ժան-Պաթիսթ Մորենը:
Լրագրողներուն հետ ունեցած զրոյցին ընթացքին Խաչատրեան յայտնած է, որ ժապաւէնը կը ներկայացնէ հայ ազգը անհանգստացնող խնդիրները:
«25 տարի նկարահանուած ֆիլմ է: Այնքան սէր կայ հերոսների խօսքերում եւ հայրենիքի մասին խօսելու ցանկութիւն: Հերոսներիս պատահական եմ հանդիպել: Ֆիլմաշարիս երկրորդ կինոնկարի հերոսը մեխանիկ Լեւոնն է, երրորդը՝ նկարիչ Վահանը, իսկ չորրորդ ֆիլմի հերոսը Ռուբէն Հախվերդեանը կը լինի», նշած է Յարութիւն Խաչատրեան:
Ըստ անոր՝ Թուրինի շարժապատկերի փառատօնը կարեւորագոյններէն է Իտալիոյ մէջ կազմակերպուածներուն մէջ: «Երեք անգամ ֆիլմի դիտում է անցկացուել: Մինչ այդ ֆիլմը երեք մրցանակների էր արժանացել. մէկը Կոսովոյում եւ երկուսը «Հայակ» մրցանակաբաշխութիւնում: Երբ սկսեցի նկարահանել իմ առաջին ֆիլմերը, ինձ թւում էր, որ բացի հայերից դրանք ոչ մէկին պէտք չեն, սակայն պարզուեց, որ ֆիլմերը կարեւոր են նաեւ արտասահմանցիների համար, որովհետեւ խնդիրները նոյնն են ամէնուր: Կինոն համամարդկային լեզու է, չկայ ազգ, որ նման պրոբլեմներ չունենայ», ընդգծած է Յարութիւն Խաչատրեան:
Հայաստանի ազգային շարժապատկերի կեդրոնի տնօրէն Գէորգ Գէորգեան շնորհաւորած է Յարութիւն Խաչատրեանը՝ այս կարեւոր մրցանակին համար։ «Անգամ Անգլիայից խնդրել են նրա ֆիլմերը ցուցադրել, որպէսզի ուսանողները տեսնեն, թէ ինչպէս է վաւերագրական ֆիլմ նկարահանւում», ըսած է Գէորգեան: Ան խոստացած է աջակցիլ Խաչատրեանի ֆիլմաշարի երկրորդ՝ «Լեւոն. Փակուղի»ի ստեղծման:
Շարժապատկերի մասնագէտ Րաֆֆի Մովսիսեան աւելցուցած է, որ վաւերագրական ժապաւէնի առաջնային խնդիրները երկրորդ դասակարգ իջած են: «Այսօրուայ վաւերագրական կինոյի առաքելութիւնը գոյութիւն ունեցող խնդիրներին անդրադառնալն է եւ հարց առաջացնելն է», շեշտած է ան։
Խաչատրեանի նոր աշխատանքի հիմքը Հայաստանէն հեռացած եւ օտար հողի վրայ նոր կեանք սկսած մարդոց պատմութիւններն են: «Անվերջ Փախուստ, Յաւերժ Վերադարձ» ֆիլմաշարը նուիրուած է այսօրուան Հայաստանի ամէնէն ցաւոտ հարցին՝ արտագաղթին: Հայրենիքէն եւ ազգէն փախուստը շարք մը երկիրներու համար խնդիր է, եւ այդ բոլոր ազգերը կ՛ուսումնասիրեն տուեալ հարցերը: Ուսումնասիրութիւն մըն է ինքնին այս ժապաւէնը։ 25 տարի անընդմէջ Յարութիւն Խաչատրեան նկարած է տարբեր մարդիկ, որոնք 1980ականներէն սկսեալ հեռացած են Հայաստանէն, հետեւած է անոնց կեանքին, ճամբորդութիւններուն, ձեռքբերումներուն: