Հայաստանի մէջ 10 հազար բնակիչի համար 70 բժիշկ

\n

Հայաստանի մէջ, մասնաւորապէս Երեւանի, բժիշկներուն թիւը բնակչութեան հետ բաղդատելով շատ աւելի մեծ է, քան բազմաթիւ այլ երկիրներու մէջ, ինչ որ կրնայ շարք մը խնդիրներ յառաջացնել։ Այս մասին յայտնած է մանկական վիրաբոյժ Շանթ Շխըրտիմեան՝ Լոս Անճելըսի Քալիֆորնիոյ համալսարանէն (UCLA):

\n

Հայաստանի մէջ, Շանթ Շխըրտիմեանի համաձայն՝ 10 հազար բնակիչի համար կայ շուրջ 70 բժիշկ, մինչդեռ այլ երկիրներու մէջ նոյն բնակչութեան թիւը ունի 30-35 բժիշկ:

\n

Ըստ վիրաբոյժին՝ առաջին խնդիրը, որ կրնայ ծագիլ բժիշկներու մեծ թիւին պատճառով, այդ բոլոր բժիշկներուն եկամուտի ապահովումն է, որ յաւելեալ ծախս է համակարգին համար:

\n

Երկրորդ խնդիրը այն է, որ ոեւէ բժիշկ լաւ ու հմուտ վիճակի մէջ գտնուելու համար պէտք է ունենայ որոշ թիւով հիւանդներ, որպէսզի անոր գիտելիքները միշտ օգտագործուին: Օրինակ, արեւմուտքի մէջ ընդունուած է, որ վիրաբոյժը տարեկան ճշդուած նուազագոյն թիւով վիրահատութիւններ կատարէ՝ իր գիտելիքները գործնականացնելու եւ հմտութիւնները կատարելագործելու համար: Իսկ եթէ երկրին մէջ բժիշկներուն թիւը մեծ է, իսկ բնակչութեանը՝ քիչ, վիրաբոյժը չի կրնար իր գիտցածը յաճախակի կերպով օգտագործել եւ կրնայ որոշ բաներ մոռնալ։

\n