Համազգայինի Կեդրոնական Վարչութիւնը կը գուժէ «Բագին»ի երկարամեայ խմբագիր Պօղոս Սնապեանի մահը

June 14, 2014 944 0


 

Այս առաւօտ, իր մահկանացուն կնքեց «Բագին» ամսագրի երկար տարիներու խմբագիր, հայ ժամանակակից գրականագիտութեան զարգացման իր ուրոյն ներդրումը ունեցած մտաւորական եւ ՀՅ Դաշնակցութեան գրական անդաստանին մէջ հանրածանօթ հեղինակութիւն`Պօղոս Սնապեան:

Պօղոս Սնապեան ծնած է 11 Օգոստոս 1927-ին, Մուսա Լերան Պիթիաս գիւղը:

Նախակրթութիւնը կը ստանայ ծննդավայրի եւ Այնճարի «Յառաջ» վարժարանին մէջ:

1944-ին կ՛ընդունուի Երուսաղէմի ժառանգաւորաց վարժարանը եւ կ՛աւարտէ զայն 1949-ին:

1950-էն սկսեալ իբրեւ ուսուցիչ կը պաշտօնավարէ ազգային վարժարաններուն մէջ, որուն առընթեր գրական եւ քննադատական իր գործերը լոյս կը տեսնեն «Նայիրի» եւ «Ակօս» հանդէսներուն մէջ: Աշխատակցած է նաեւ սփիւռքահայ շարք մը թերթերու՝ պատմուածքներով, տպաւորապաշտ էջերով եւ քննադատական եւ հրապարակագրական յօդուածներով:

1962 Յունուարին, Կարօ Սասունիի խմբագրապետութեամբ, երբ լոյս կը տեսնէ Հ.Յ. Դաշնակցութեան նախաձեռնութիւնը հանդիսացող գրականութեան եւ արուեստի «Բագին» ամսագիրը, Եդուարդ Պօյաճեանի հետ կը կոչուի խմբագիրի պատասխանատու պաշտօնին:

1962-ին կը մեկնի Փարիզ եւ Սորպոնի եւ Ալիանս Ֆրանսէզի մէջ երկու տարի, իբրեւ ազատ ունկնդիր կը հետեւի գրական եւ իմաստասիրական դասընթացքներու: Վերադարձին շարունակելով «Բագին»ի մէջ վստահուած աշխատանքները,միաժամանակ կը դասաւանդէ հայ գրականութիւն, Այնճարի եւ Պէյրութի ազգային երկրորդական վարժարաններու աւարտական դասարաններուն մէջ:

1966-1973-ին մաս կը կազմէ «Ազդակ» օրաթերթի խմբագրութեան, իբրեւ ազգային եւ գրական- մշակութային էջերու պատասխանատու խմբագիր:

Եղած է Մեծի Տանն Կիլիկիոյ Կաթողիկոսութեան մէջ հաստատուած (1966), «Գէորգ Մելիտինեցի» գրական դատակազմի անդամ եւ խմբագրած է աւելի քան 50 գրական հատոր:

1983-1989-ին կ՛աւանդէ հայ գրականութիւն՝ «Համազգային»ի Հայագիտական Բարձրագոյն Հիմնարկի բոլոր դասարաններուն:

Պօղոս Սնապեանի Հրատարակած Գործերը:

 

  • Ժամանակ Չկայ (1953)
  • Յեղափոխութեան Համար (1956)
  • Վերջին Արարը (1958)
  • Անդրշիրիմեան Ձայներ (1960)
  • Աւազախրած Նաւը (1963)
  • Ես Այդ Շունն Եմ (1966)
  • Կորստական Թոյներ (1970)
  • Աղքատներու Աւանդութւինը Ա. Հատոր (1983)
  • Ի՞նչպէս Հայհոյեմ (1990)
  • Միջնարար (1992)
  • Յայսմաւուրք (1997)
  • Տարեդարձներ (2001)
· Աղքատներուն Աւանդութիւնը Բ.Հատոր (2002)
· Կրկէսին Մէջ (Քննադատական յօդուածներ 2005)
· Տպաւորութիւններու Հէնքով (Քննադատական յօդուածներ)
· Վերծանումներ (Ուսումնասիրութիւն)
· Պատիժներ (2008)
· «Ես Իմ Անուշ»ի Ոդիսականը (Ուսումնասիրութիւն)
· Ձգողական (2010)

Այլ Հրատարակութիւններ

  • Միջնաբերդ (գրական տարեգիրք) 1957-1959
  • Հանդիպումներ Ուիլիըմ Սարոյեանի հետ (1978)
  • Հայաստանի Երիտասարդ Արձակագիրները (1980)
  • Արագիլ (1984)


Leave a Comment

You must be logged in to post a comment.