Մարտ 8-ը` Կնոջ Միջազգային Օր
Մարտ 8-ը, Կնոջ միջազգային օրն է: Առաջին անգամ այս օրը նշուած է 1909-ի փետրուար 28-ին, հետագային անիկա փոխադրուած է մարտ 8-ին:
1909-էն ի վեր, ամէն տարի Կնոջ միջազգային օրը բնաբան մը կ՛որդեգրէ. այս տարուանը հետեւեալն է` «Խոստումը խոստում է. ժամանակն է գործի լծուելու` վերջ տալու համար կնոջ հանդէպ գործադրուող վայրագութեանց»:
Այս օրը աշխարհի չորս ծագերուն կը նշուի խորհրդանշական ցոյցերով, տօնակատարութիւններով, խորհրդաժողովներով` փառաբանելու համար կնոջ ձեռք բերած նուաճումները` տնտեսական, քաղաքական, մշակութային եւ ընկերային մարզերէն ներս, բայց նաեւ` պահանջելու ցարդ ձեռք չբերուած իրաւունքներ, ինչպէս նաեւ` բարելաւելու աշխարհի բոլոր կիներուն իրավիճակը, յատկապէս` որ զարգացած երկիրներու մէջ:
Մարտ 8-ը կարգ մը երկիրներու մէջ կորսնցուցած է իր իմաստը եւ միաձուլուած է Մայրերու օրուան եւ սիրահարներու օրուան հետ: Այս օրը մեծ շուքով կը նշուէր Խորհդային Միութեան ամբողջ տարածքին եւ բնականաբար Հայաստանի մէջ:
Մեր օրերուն մարտ 8-ը պաշտօնական արձակուրդի օր է շատ մը երկիրներու մէջ, ինչպէս` Քուպայի, Մոլտաւիոյ, Ռուսիոյ, Վիեթնամի, Քամպոտիոյ, Պուրքինա Ֆասոյի, Հայաստանի եւ այլն…
Ինչ կը վերաբերի Չինաստանին, Մատակասքարին եւ Նեփալին, մարտ 8-ը աշխատանքային օր չէ մի միայն կիներուն համար:
Ընդհանրապէս ընդունուած սովորութիւն է մարտ 8-ին ծաղիկ կամ խորհրդանշական բան մը նուիրել կնոջ, մօր, քրոջ կամ աղջկան:
– Հայաստանի մէջ, Խորհրդային Միութեան փլուզումէն ետք, մարտ 8-ի տօնակատարութիւնները կորսնցուցին իրենց շուքը, փոխարէնը մեծ ժողովրդականութիւն գտած է «Գեղեցկութեան եւ մայրութեան» օրը, որ որպէս պետական տօն կը նշուի ապրիլ 7-ին:
– Իտալիոյ, Ռուսիոյ եւ Ալպանիոյ մէջ սովորութիւն է մարտ 8-ին դեղին միմոզա կամ տուրմ նուիրել կիներուն:
– Պրազիլի, Պուլկարիոյ, Լեհաստանի, Ռումանիոյ եւ Լաթվիոյ մէջ աշակերտները ծաղիկ կը նուիրեն իրենց ուսուցչուհիներուն, իսկ տղամարդիկ` ծաղիկ իրենց կին պաշտօնակիցներուն:
– Փորթուգալի մէջ կիները առանձին կը հաւաքուին եւ կերուխումի խնճոյքներ կը կազմակերպեն: