Կուտակայինին Դէմ Կը Բողոքեն Նաեւ Երեւանի Մեթրոյի Աշխատակիցները
ԵՐԵՒԱՆ, «Ազատութիւն».– Երեւանի Կ. Դէմիրճեանի անուան մեթրոյի քանի մը տասնեակ աշխատակիցներ 12 Փետրուարին բողոքի ցոյց կատարած են մեթրոյի վարչական շէնքին մօտ՝ պահանջելով վերադարձնել իրենց աշխատավարձերէն կատարուած պարտադիր կուտակային պահումները:
Ցուցարարները՝ հիմնականին մէջ մեքենավարներ ու փականագործներ, ստացած են Յունուար ամսուան աշխատավարձը, եւ պարզուած է, որ անիկա զեղչուած է 10-14 հազար դրամով: Անոնք կը պնդեն, որ մեթրոյի ղեկավարները այս մէկը ըրած են գաղտնի, առանց հաշուի առնելու Սահմանադրական դատարանի որոշումը:
Անակնկալի եկած մարդիկ կը պահանջէին վերադարձնել այդ գումարները. կազմակերպած են ստորագրահաւաք ու իրենց պահանջքը գրաւոր ներկայացուցած մեթրոյի տնօրէնութեան:
«Պահանջում ենք, առաջինը, որ մեր գումարները հետ վերադարձնեն: Երկրորդը՝ չենք ուզում, որ այդ կենսաթոշակային ֆոնդը գործի», «Ազատութեան» հետ ունեցած զրոյցին ընթացքին յայտնած է ցուցարարներէն մէկը:
«90 հազարով ապրող մարդը, 5-8 հազար պահւում է, ու ամէն ինչի գները բարձրանում են, ես ո՞նց եմ պահելու իմ երեխեքին: Վաղը-միւս օրը ես իմ երեխայի համար ի՞նչ ապագայ եմ ստեղծելու», վրդոված աւելցուցած է ուրիշ մը:
Որոշ աշխատակիցներէ կատարուած կրճատումները աւելի մեծ են՝ 14 հազար դրամ, ինչ որ, ըստ անոնց, զգալի հարուած է իրենց ընտանեկան պիւտճէներուն. «Փաստացի դուրս եկաւ աշխատավարձի իջեցում: Ինչ ուզում էք սրա անունը դրէք»:
Մեթրոյի աշխատակիցները նաեւ նշած են, որ երբեք վստահ չեն, թէ 30-40 տարի ետք պիտի ստանան իրենցմէ առնուած գումարները. «30 տարի յետոյ համակարգը լրիւ վարի գնաց, ի՞նչ են անելու: Ո՞նց են այդ գումարները հետ վերադարձնելու»:
Մեթրոյի տնօրէնութիւնը խոստացած է յառաջիկայ օրերուն արձագանգել աշխատակիցներուն պահանջներուն: Մեքենավարներն ու փականագործները առայժմ գործադուլի դիմելու սպառնալիք չեն ներկայացներ, սակայն կը զգուշացնեն, որ իրենց իրաւունքները պաշտպանելու համար մինչեւ ծայր պիտի երթան. «Կը դիմենք աւելի վերեւ՝ քաղաքապետարան, կառավարութիւն: Եթէ կառավարութիւնն էլ արդէն չարեց, յետոյ կ՛որոշենք»:
Մեթրոյի աշխատակցիներու բողոքին միացած էին «Դէմ եմ» նախաձեռնութեան անդամները: Անոնք ցուցարարներուն յորդորած են չենթարկուիլ գործատուին «շանթաժ»ին ու ճնշման, պայքարիլ սեփական իրաւունքներուն համար. «Անցել է այն ժամանակը, երբ պէտք է ժողովրդին ճնշեն, ժողովրդին վախեցնեն աշխատանքից հեռացնելու սպառնալիքով: Դա նոյնիսկ քրէօրէն պատժելի է: Ձեր գումարները ձեր սեփականութիւնն են, եւ Սահմանադրութեամբ ամրագրուած է, որ դուք ինքներդ էք իրաւասու այն տնօրինել ըստ ձեր հայեցողութեան: Ցանկացած պահում ձեր աշխատավարձից առանց ձեր համաձայնութեան նոյնպէս օրէնքի խախտում է»: