December 03, 2025
20ամեայ Զինուոր Հայկ Քալանթարեան Նահատակուեցաւ Թշնամիի Կրակոցէն
- (0)
ՍՏԵՓԱՆԱԿԵՐՏ.- Չորեքշաբթի, 7 Փետրուարին, Արցախի հարաւային սահմանը պաշտպանող զօրամասերէն մէկուն պահպանութեան դիրքերուն վրայ, Ատրպէյճանի բանակին կողմէ արձակուած կրակոցէն մահացու վէրք ստացաւ Պաշտպանութեան բանակի (ՊԲ) զինուոր, 1998ի ծնունդ Հայկ Ռազմիկի Քալանթարեանը:
Արցախի Հանրապետութեան պաշտպանութեան նախարարութիւնը հրապարակեց հաղորդագրութիւն մը, ուր կը յայտնէ իր վշտակցութիւնը զոհուած զինծառայողի ընտանիքի անդամներուն, հարազատներուն եւ ծառայակիցներուն:
Արցախի նախագահ Բակօ Սահակեան Փետրուար 8ին ստորագրեց հրամանագիր՝ պետական սահմանը պաշտպանելու ատեն ցուցաբերած արիութեան համար, Արցախի Հանրապետութեան պաշտպանութեան բանակի N զօրամասի զինծառայող Հայկ Քալանթարեանը յետ մահու պարգեւատրելով «Մարտական ծառայութիւն» շքանշանով:
Հայկը Տաւուշի մարզի Նաւուր գիւղէն էր: Ունի քոյր մը եւ եղբայր մը: Քրոջ անունը Յասմիկ է: Եղբայրը իրմէ փոքր է: Աղքատ ընտանիքէ է: Ծնողները աշխատանք չունին:
