Ռապըրթ Քենետի Վերահաստատեց Արցախը Հայութեան Վերադարձի Ջանքերուն Զօրակցելու Իր Պատրաստակամութիւնը
Ամերիկայի Հայ դատի յանձնախումբը կը տեղեկացնէ, որ ազգային բարերար Մայք եւ Եւելինա Սարեան ամոլին եւ հայ համայնքի այլ ղեկավարներու կողմէ Հարաւային Քալիֆորնիոյ մէջ կազմակերպուած հաւաքի մը ընթացքին Միացեալ Նահանգներու նախագահի անկախ թեկնածու Ռապըրթ Քենետի Կրտսեր անգամ մը եւս վստահեցուց, որ պիտի զօրակցի Արցախը հայութեան վերադարձնելու եւ հայկական հողերը վերամիացնելու ջանքերուն` յիշեցնելով, որ Արցախը առնուազն ՆՔ 200 թուականէն ի վեր հայկական եղած է: Ան «ցնցիչ» որակեց այն իրողութիւնը, որ աշխարհը լուռ կը մնայ Արցախի մէջ գործուած ցեղասպանութեան նկատմամբ:
Նախապէս ան տեսանիւթով մը խոստացած էր, որ իր վարչակազմը միջազգային համայնքը պիտի մղէ պատժամիջոցներ կիրարկելու Ազրպէյճանի դէմ` ապահովելու համար հայերու ապահով վերադարձը Արցախ եւ աջակցելու արցախահայերու ինքնորոշման իրաւունքին:
Նշենք, որ Ռապըրթ Քենետի Կրտսերը անցեալ աշնան հեռացաւ Դեմոկրատական կուսակցութենէն եւ յայտարարեց, որ Միացեալ Նահանգներու նախագահի պաշտօնին անկախ թեկնածու է: Ան Միացեալ Նահանգներու նախկին նախագահ Ճոն Քենետիի եղբօր` Ռապըրթին որդին է:
Comments are closed.