Պայքարը Պիտի Շարունակուի Որքան Պահանջուի. Բագրատ Սրբազան

6 Հոկտեմբերին, Երեւանի Հանրապետութեան հրապարակին վրայ տեղի ունեցաւ «Սրբազան պայքար»ի հանրահաւաքը, որուն ընթացքին Բագրատ սրբազանը վստահեցուց, որ պայքարը պիտի շարունակուի՝ շեշտելով, որ պայքարը ո՛չ ընդդիմութեան եւ ոչ ալ ընդդիմադիր պայքար է: «Սա բոլորինն է, անգոյն՝ բոլոր գոյներով։ Յարգանքով եմ վերաբերւում բոլորին՝ անկախ նրանց քննադատութիւններից, մտահոգութիւններից, որոնք ազնիւ կերպով են կատարւում, չեմ էլ չափում ազնուութիւնը։ Իսկ բոլոր նրանց, որոնք չարամտօրէն իրենց յանկարծ դուրս դրուած են զգացել այս ամբողջ իրականութիւնից կամ թաքնուած սատարում են այս իշխանութիւններին՝ որոշ խմբեր ու դերակատարներ, դարձեալ բարեմտօրէն չեմ արձագանգել եւ թերեւս չարձագանգեմ ձեզ՝ յարգելի քաղաքական դաշտում գործողներ՝ չարամտօրէն գործողներ։ Չեմ արձագանգելու ձեր ամենանողկալի յայտարարութիւններին։ Դուք ձեր ազնուութիւնը, յաւակնութիւնները խեղճութիւնը գնահատէք՝ համեմատելով ձեր յաւակնութիւնների հետ։ Եւ այդպիսով որոշէք, թէ ո՛ր դաշտում էք գործող՝ անձնական, խմբակային տիրոյթում, թէ հայրենիքի ազատագրութեան», ըսաւ Բագրատ սրբազանը։
Ան նշեց, որ բոլոր նախագահներուն օրերուն եւս ինք գտնուած է ընդդիմադիր դիրքերու մէջ, բայց «մենք այդ ժամանակահատուածում ապրել ենք սխալների տիրոյթում, հիմա ապրում ենք ողբերգութեան տիրոյթում։ Ես նախագահներին էլ եմ այդ մասին ասել»։

«Մենք այդ բոլոր ժամանակահատուածում ունեցել ենք Արցախ, գտնուել ենք անվտանգութեան բարձրագոյն աստիճանի վրայ։ Մեր խնդիրները եղել են մեր տան ներսի խնդիրները. ոչ մի թշնամական երկիր մեզ ո՛չ սպառնացել է, ո՛չ էլ պարտադրել», ըսաւ սրբազանը՝ վստահեցնելով, որ հրապարակին վրայ պիտի մնայ այնքան, որքան պահանջուած է:

«Այն տեսքով, որ Մայիսի 9նն էլ, Մայիսի 26ն էլ, Մայիսի 12ն էլ, Յունիսի 9նն էլ կը լինի մեր յաղթանակը։ Մենք դիտորդներին, խորհուրդ, ցուցում տուողներին էլ ենք հրաւիրում մասնակցելու այդ բոլորին։ Երբ այս հրապարակը կը լինի ողողուած հայրենատէր մարդկանցով, որոնք այստեղ գտնուել են եւ մի քանի անգամ, այո՛, խոստանում եմ՝ կ՛իրականանայ այն, ինչ ցանկանում էք ի շահ մեր պետութեան, ի շահ մեր յաղթանակների», ըսաւ ան։
Ապա Բագրատ սրբազանի գլխաւորութեամբ ցուցարարները ուղղուեցան դէպի Սահմանադրական դատարանը։ «Գնալու ենք հանրայնացնելու ու ամօթի, անարգանքի սիւնին գամելու բոլոր այն դատաւորներին, որոնք այս վերջին որոշումն են ընդունել, միեւնոյն ժամանակ հնարաւորութիւն ենք տալու նրանց, որպէսզի ազատուեն ծառայամտութիւնից», ըսաւ սրբազանը։

Այնտեղ յայտարարուեցաւ, որ Չորեքշաբթի, 9 Հոկտեմբերին պիտի համախմբուին դատախազութեան առջեւ, «որովհետեւ մեր ձեռքում ունենք փաթեթներ ու բոլոր օջախների նկատմամբ քրէական գործեր յարուցուելու յայտեր են ներկայացուելու»։