«Չպէտք Է Թոյլ Տալ Փաշինեանին Կրկին Խաբել Ժողովրդին Եւ Հերթական Զիջումը Ներկայացնել Իբրեւ Ձեռքբերում». Սաղաթելեան

ՀՅԴ Հայաստանի Գերագոյն մարմինի ներկայացուցիչ, Ազգային ժողովի «Հայաստան» խմբակցութեան պատգամաւոր Իշխան Սաղաթելեան անդրադարձաւ Ուաշինկթընի համաձայնութեան եւ անոր լոյսին տակ Հայաստանի վարչապետին կողմէ ժողովուրդին ուղղուած ուղերձին՝ շեշտելով, որ Փաշինեան դարձեալ կը փորձէ խաբել ժողովուրդը եւ ստորագրուած պայմանագրութիւնը ներկայացնել իբրեւ մեծ ձեռքբերում մը, մինչեւ խորքին մէջ Հայաստանի ի նպաստ ոչինչ կայ անոր մէջ։

Սաղաթելեան գրած է հետեւեալը.

«Փաշինեանի ուղերձը խոստովանութիւն էր Վաշինգտոնեան գործընթացի տապալման մասին: Ինչո՞ւ:

 «1. Ադրբեջանի հետ «յարատեւ խաղաղութեան» հաստատման ու «կոնֆլիկտի (հակամարտութեան) էջը փակելու» մասին յայտարարութիւններից ընդամէնը մի քանի օր անց Փաշինեանը, քաջ գիտակցելով, որ այդ յայտարարութիւնները թողնում են տպաւորութիւն, որ այլեւս աւարտուած է մեր ժողովրդի ու երկրի հաշուին նոր զիջումներ իրականացնելու փուլը, ստիպուած էր ուղիղ եթերում խոստովանել, որ դեռեւս կան ադրբեջանական նոր պահանջներ, որոնց կատարման շուրջ ինքն այժմ բանակցում է: Հենց այդ նոր զիջումներին նախապատրաստելու համար էին յայտարարութիւնները, որ մեր վերահսկողութեան տակ դեռեւս կան ադրբեջանական տարածքներ: Այսինքն` Փաշինեանը, իր իսկ խօսքերով, «դարի պայմանագիրը» նախաստորագրելուց ընդամէնը ժամեր անց ստիպուած էր յայտարարել, որ դրանով մեր զիջումները չեն աւարտւում:

 «2. Աւելին, Փաշինեանն, ըստ էութեան, յայտարարեց, որ ադրբեջանական զօրքերը դուրս չեն գալու օկուպացուած (գրաւուած) տարածքներից: Մինչդեռ ընդամէնը մի քանի ամիս առաջ վարչախմբի ներկայացուցիչները յայտարարում էին, որ այդ հարցը լուծուելու է սահմանազատման ու սահմանագծման շրջանակներում: Սակայն, յայտարարելով, որ հայկական վերահսկողութեան տակ կան ադրբեջանական տարածքներ, Փաշինեանը փակեց ադրբեջանական զօրքերի դուրս բերման հարցը` դուռ բացելով նոր տարածքային զիջումներ համար:

 «3. Չնայած իրականացուած տեղեկատուական ահաբեկչութեանը, չնայած Վաշինգտոնում ձեռք բերուած պայմանաւորուածութիւնների վերաբերեալ հարցեր բարձրաձայնողներին «պատերազմ տենչացնողներ» պիտակաւորելուն ու սեփական ժողովրդին նոր պատերազմով սպառնալուն, Փաշինեանը ստիպուած էր խոստովանել, որ հանրութեանը խաբել, խոշոր հաշուով, չի ստացուել, եւ մարդիկ տալիս են պարզ հարցեր` «ինչպէ՞ս ենք խաղաղութիւն հաստատում, երբ՝

 «– Մեր գերիները չեն վերադարձել,

 «– Երբ ադրբեջանական զօրքը ՀՀ տարածքում է,

 «– Երբ չի քննարկւում Արցախի հայերի իրաւունքների հարցը, որից էլ ծագել է այս ամբողջ հակամարտութիւնը»:

 «Սրանք ամենաբնական հարցերն են, որոնք առաջինն են առաջանում մարդկանց մտքերում, երբ յայտարարում են, որ բացուել է «խաղաղութեան դարաշրջան»:

 «Սակայն, քանի որ այս հարցերին պատասխաններ չկան, վարչախմբի ներկայացուցիչները միայն պիտակաւորում են հարցեր տուողներին եւ շարունակում վախեցնել մեր ժողովրդին:

 «4. Փաշինեանը նաեւ փորձեց ներկայացնել, որ իր գործունէութեան վերաբերեալ որեւէ ընդվզում չկայ, ուստի բոլորը համաձայն են դրանց հետ: Մինչդեռ բաց է մնում հարցը, եթէ մեր երկրում իր վարած քաղաքականութեան դէմ ընդվզում չկար, 2022 թ. Յունիսի 3ին ինչո՞ւ կրակեցին ժողովրդի վրայ, 42 անձ կալանաւորեցիք, ինչո՞ւ նոյնն արեցիք 2024 թ. Յունիսի 12ին` մարմնական վնասուածքներ պատճառելով 101 քաղաքացու, կալանաւորելով 18ին, եթէ ընդվզում չկայ` այսօր Սրբազան պայքարի ընկերների դատն ինչի՞ մասին է:

 «Իրականում այս պայմանաւորուածութիւնները ձեռք բերելու համար Փաշինեանը ստիպուած է եղել Հայաստանում բանտերը լցնել քաղբանտարկեալներով, արշաւ իրականացնել եկեղեցու, ընդդիմադիր բոլոր ուժերի եւ կառոյցների նկատմամբ:

 «Միշտ կարելի է ուժային ռեսուրսներով (միջոցներով) ճնշել բողոքի խաղաղ գործողութիւնները, բանտերը լցնել ընդդիմախօսներով ու յայտարարել, որ քո վարած քաղաքականութեան դէմ բողոք չկայ: Ուստի այս փաստարկը եւս որեւէ քննադատութեան չի դիմանում:

 «5. Փաշինեանը, ի հարկէ, լռեց այն մասին, որ համաձայնագրի ստորագրումից անմիջապէս յետոյ Ալիեւը կրկնեց ՀՀ սահմանադրութիւնը փոխելու պահանջի մասին` այն անուանելով Փաշինեանի «տնային աշխատանք»: Լռեց նաեւ այն մասին, որ Ադրբեջանում մէկ վայրկեան չդադարեցին Հայաստանը ադրբեջանցիներով բնակեցնելու պահանջները:

«Փաշինեանի ուղերձը ըստ էութեան հաստատումն էր ընդդիմադիրների եւ փորձագէտների լուրջ մտահոգութիւնների, որ այս կերպ մենք պարզապէս չենք կարող ունենալ խաղաղութիւն, անկախ այն բանից` քանի անգամ կ՛օգտագործուի խաղաղութիւն բառը:

«Ուստի չափազանց կարեւորում եմ այս օրերին ընդդիմութեան ներկայացուցիչների, փորձագիտական դաշտի, լրագրողների կողմից իրականացուող հետեւողական աշխատանքը, որի շրջանակներում մեր ժողովրդին ներկայացւում է ճշմարտութիւնը: Այս ուղերձը հաստատումն է, որ այդ աշխատանքը տալիս է իր արդիւնքները: Ուստի պէտք է առանց յոգնելու շարունակել իրականացնել այդ չափազանց կարեւոր առաքելութունը`

«թոյլ չտալով Փաշինեանին` կրկին խաբել ժողովրդին եւ հերթական զիջումը ներկայացնել իբրեւ բաղձալի ձեռքբերում: Հենց դա է հանդիսանալու իրավիճակի փոփոխութեան գլխաւորը նախադրեալը»: