Շահրամանեան. «Ռազմական Գործողութիւնները Սկսելէ Ժամեր Ետք Հասկցայ, Որ Մնացած Ենք Մինակ. Ռուսական Կողմը Դիտորդի Դերին Մէջ Էր»

«Ռազմական գործողութիւնները սկսելէ ժամեր ետք հասկցայ, որ մնացած ենք մինակ. ռուսական կողմը դիտորդի դերին մէջ էր: Արցախի հանրային պատկերասփիւռի կայանին տուած հարցազրոյցի ընթացքին յայտարարած է Արցախի Հանրապետութեան նախագահ Սամուէլ Շահրամանեանը:

«19 սեպտեմբերին ես առաւօտեան կը գտնուէի ռուս խաղաղապահներու հրամանատարին մօտ, առաջին ազդակը, որ կարելի է սկսին ռազմական գործողութիւնները, եղած է այն, որ Շուշիի զրահապատի յուշարձանին մօտ, ուր կայ 2 յենակէտ` ռուսական ու ազրպէյճանական, ազրպէյճանական յենակէտէն մօտեցած են ռուսական յենակէտին եւ զգուշացուցած, որ թաքցուցէք անձնակազմը, շուտով պիտի աշխատի հրետանին: Այդ փաստը մենք ներկայացուցած ենք ռուս խաղաղապահներու հրամանատարին. անոնք ալ տեղեակ էին ատոր մասին, եւ ճշդումներէ ետք հաստատուած է այդ փաստը: Ինծի համար պարզ եղած է, որ որոշ ժամանակ ետք հաւանական է սկսի ռազմական գործողութիւնը: Արդէն տեւական ժամանակ մեր զինեալ ուժերը ու ուժային կառոյցները բարձր մարտական վիճակի բերուած էին, համապատասխան հրահանգները տրուած էին` ներառեալ քաղաքացիական պաշտպանութեան հետ կապուած», նշեց Շահրամանեան` աւելցնելով, որ աշխատասենեակ բարձրանալէ կէս ժամ ետք հրետակոծութիւնը սկսած է, գրեթէ բոլոր շրջանները կ՛ենթարկուէին աշխուժ հրետակոծութեան:

«Ռազմական գործողութիւնները սկսելէ յետոյ ժամեր ետք ես հասկցած եմ, որ մենք մինակ ենք ազրպէյճանական այդ նախայարձակումին դէմ: Ռուսական կողմը դիտորդի կարգավիճակին մէջ էր, մենք պէտք է ինքնորոյն ունակ ըլլայինք կարգաւորելու մեր հարցերը: Պաշտպանութեան բանակը այլ ուժային կառոյցներու, նաեւ` մեր բնակչութեան հետ միասին սկսած է ռազմական գործողութիւններու պատասխան գործողութիւնները եւ նոյնինքն այդ գործողութիւններուն շնորհիւ էր, որ կարելի եղաւ ազրպէյճանական կողմէն բանակցութիւններու սկսիլ: Մեզի համար պարզ էր, որ անհրաժեշտ է կանգնեցնել ռազմական գործողութիւնները, քանի որ ուժերը անհամեմատ էին եւ ինչքան երկար շարունակէինք, այդքան` կ՛ունենայինք զոհեր եւ կորուստներ», նշեց Շահրամանեան` աւելցնելով, որ իր նպատակը` իբրեւ Արցախի նախագահի` կը կայանար անոր մէջ, որ ըստ կարելւոյն արագ կանգնեցուէին ռազմական գործողութիւնները, եւ խուսափէինք աւելի շատ զոհերէ: