Շահումեանի արծիւը․ Այսօր Շահէն Մեղրեանի Յիշատակի Օրն է
Արցախեան հերոս Շահէն Զինաւորի Մեղրեանը ծնած է 1952-ի Յունուար 2-ին Շահումեանի շրջանի Գիւլիստան գիւղը:
Շահէն Մեղրեան առաջիններէն էր, որ սկսաւ կազմակերպելու զինուած ջոկատներ: 1990-ին անդամագրուած է ՀՅԴ կուսակցութեան:
1991 թուականին` «Օղակ» գործողութենէն ետք, Ատրպէյճան գրաւեց Էրքեջ, Բուզլուխ, Մանաշիդ գիւղեր: Սեպտեմբերին Շահէն Մեղրեան կազմակերպեց գործողութիւն, որու արդիւնքով Սեպտեմբեր 11-13-ին ազատագրուեցան երեք գիւղերը:
1992-ի Յունիսին Շահէն Մեղրեան Հաթերք գիւղին մէջ հաւաքեց 25 հոգինոց ջոկատ եւ մտաւ թշնամիի թիկունք: Հայդուկներու անմիջական օգնութեամբ ազատագրուեցան Մարտակերտի շարք մը գիւղեր` Հաթերքը, Ակնաբերդը, Մատաղիսը, Տօնաշէնը, Դաստագիրը, Սարսանգի ջրամբարը:
1993-ի Ապրիլ 17-ին ուղղաթիռը, որու մէջ էր Շահէն Մեղրեանը` իր զինակիցներուն հետ, զարնուեցաւ,եւ բոլորը զոհուեցան:
2014 թուականի Հոկտեմբեր 24-ին Շահէն Մեղրեանին յետմահու շնորհուեած է «Արցախի հերոս» կոչումը: