Մեկնարկ` Հայ Դատի Ամառնային Վարժողական Ծրագիրներուն
Ամերիկայի Հայ դատի յանձնախումբի այս տարեշրջանի «Լէօ Սարգիսեան», «Մարալ Մելքոնեան-Աւետիսեան» եւ «Յովիկ Սաղտըճեան» վարժողական ծրագիրներուն մասնակցողները արդէն իսկ ժամանած են եւ լծուած` աշխատանքի: Անոնք Հայ դատի ներկայացուցիչներուն ընկերանալով` քոնկրեսականներու հետ հանդիպումներ ունեցան եւ արծարծեցին բազմաթիւ հարցեր, որոնց կարգին` Արցախի եւ Հայաստանի ապահովութիւնը, ամերիկեան դպրոցներու մէջ Հայոց Ցեղասպանութեան դասաւանդման իրականացումը եւ միաժամանակ Ազրպէյճանի ու Թուրքիոյ դէմ պատժամիջոցներու սահմանումը:
Այս տարուան ծրագիրին մասնակցողներն են` Արամ Գէորգեան, Քրիսչըն Երելեքեան, Թարա Թազեան, Լար Թապաքեան, Վիքթորիա Թոփալեան, Անի Ժամկոչեան, Ալեքս Կիւլճեան, Զապէլ Համբարեան, Սիւնէ Համբարեան, Արամ Հես, Նաթալիա Մաթոսեան, Սթեֆըն Փիտեճեան, Կրեկըրի Քոտիլեան եւ Մելոտի Սերայտարեան:
Միացեալ Նահանգներու տարբեր շրջաններէ ժամանած այս երիտասարդները պիտի շարունակեն գործնական դերակատարութիւն ունենալ` Միացեալ Նահանգներու եւ Հայաստանի միջեւ քաղաքական, դիւանագիտական եւ մշակութային յարաբերութիւնները սերտացնելով եւ զանազան փորձառութիւններ ձեռք ձգելով: