Մայր Աթոռը Կը Դատապարտէ «Յարձակում Ու Բռնութիւն Հրահրելու Փորձը»

  • July 21, 2025
  • (0)

Հայաստանի վարչապետ Նիկոլ Փաշինեան 20 Յուլիսին յայտարարեց Վաղարշապատի կեդրոնական հրապարակին վրայ հաւաք կազմակերպելու եւ «Մայր Աթոռի նկատմամբ հերթական ոտնձգութիւնը նախաձեռնելու մասին»: Մայր Աթոռ Սուրբ Էջմիածինը դատապարտեց «յարձակում ու բռնութիւն հրահրելու այս փորձը, որը բացայայտ միջամտութիւն է Հայոց եկեղեցու կեանքին եւ նրա ինքնակառավարմանը», յայտարարութեան մը միջոցով յայտնեց Մայր Աթոռի տեղեկատուական համակարգը:

«Յորդորում ենք իշխող քաղաքական ուժին դադարեցնել հակաեկեղեցական, անօրինական արշաւը եւ լծուել երկրի առջեւ ծառացած լրջագոյն հիմնախնդիրների յաղթահարմանը: Միաժամանակ դիմում ենք պետութեան իրաւասու մարմիններին եւ պաշտօնեաներին ձեռնարկել բոլոր անհրաժեշտ եւ օրինական միջոցները` կանխարգելելու հակաօրինական այս միջոցառումը», կ՛ըսուի վերոնշեալ յայտարարութեան մէջ:

Էջմիածինը «բարձրօրէն գնահատում է բարեպաշտ մեր ժողովրդի սերն ու հաւատարմութիւնը հանդէպ Մայր եկեղեցին եւ նախանձախնդրութիւնը` պաշտպանելու համայն հայութեան հոգեւոր կենտրոնն ու մեր նուիրական սրբութիւնները», եւ կոչ կ՛ուղղէ «մեր ժողովրդի զաւակներին չտրուել իշխանութիւնների սադրանքներին, պահպանել զգօնութիւնն ու ողջախոհութիւնը եւ հաւատով ու աղօթական ոգով համախմբուել առկայ փորձութիւնների դիմագրաւման համար»:

Փաշինեան տակաւին օրական դրութեամբ կը շարունակէ իր ոչ-պատշաճ գրառումները եւ յարձակողական դիրքորոշումները եկեղեցւոյ եւ յատկապէս Գարեգին Բ. կաթողիկոսի հասցէին: «Կտրիճ Ներսիսեանը պէտք է ազատի Վեհարանը: Վեհարանը վեհի՛: Ապրէք աղօթքով, պահեցողութեամբ, ծոմապահութեամբ եւ պատրաստուէք Մեծ հոգեւոր հանդիպման Էջմիածնի կենտրոնական հրապարակում», գրած է Փաշինեան:

Related Articles