ՀՕՄ-ի Մոնթրէալի «Սօսէ» եւ Լաւալի «Շուշի» մասնաճիւղերու վարչութեանց Հաղորդագրութիւն

Հաղորդագրութիւն

Թագաժահրի համաճարակին պարտադրած սահամանափակումի պայմաններուն հետեւանքով, Հայ Օգնութեան Միութիւնը, բարեսիրական այլ կազմակերպութիւններու նման, դէմ յանդիման գտնուեցաւ տնտեսական դժուարութիւններու՝ իր ծրագիրները իրագործելու համար:

ՀՕՄ-ի Գանատայի Շրջանի Մոնթրէալի եւ Լաւալի զոյգ մասնաճիւղերը, հաւատարիմ իրենց ուխտին, շարունակեցին իրենց գործունէութիւնը եւ օժանդակելով հանդերձ իրենց գաղութի պահանջնքներուն եւ ՀՕՄ-ի ընթացիկ ծրագիրներուն, զօրակցեցան Լիբանանահայութեան եւ Արցախի ի նպաստ շտապ օգնութեան դրամահաւաքներուն:

ՀՕՄ-ի Մոնթրէալի եւ Լաւալի զոյգ մասնաճիւղերու եկամուտը կը գոյանայ անդամավճարներէ, նուիրատուութիւններէ եւ առիւծի բաժինը հանդիսացող՝ հասութաբեր զանազան ձեռնարկներէ, որոնք բնականաբար կարելի չեղաւ կազմակերպել ներկայ պայմաններուն մէջ:

Պահը արտասովոր է եւ ՀՕՄ-ի գործունէութիւնը սուրբ:

Հետեւաբար, Մոնթրէալի եւ Լաւալի մասնաճիւղերու վարչութիւնները, խորհրդակցաբար ՀՕՄ-ի Գանատայի Շրջանային վարչութեան հետ, որոշում կայացուցին չեղեալ համարել 15 մարտ, 2020 թուակիր կանանց միջազգային օրուայ տօնակատարութիւնը եւ օրին բացայայտուած ծախսերը ամբողջացնելէ ետք, մնացեալ գումարը ամբողջութեամբ յատկացնել ՀՕՄ-ի ծրագիրներուն:

Շնորհակալութիւն ձեր հասկացողութեան եւ ձեր վստահութեան հանդէպ ՀՕՄ-ի աշխատանքներուն:

Ժողովուրդիս հետ, ժողովուրդիս համար:

Հայ Օգնութեան Միութեան մասին

Հայ Օգնութեան Միութիւնը ինքնավար, ոչ-կառավարական եւ ոչ-դաւանական մարդասիրական կազմակերպութիւն մըն է, որ կը ծառայէ հայ ժողովուրդին եւ կը ձգտի պահպանել հայութեան մշակութային ինքնուրոյնութիւնը:

Հայ Օգնութեան Միութեան գործունէութեան դաշտը ընդարձակ է եւ յարատեւ կը յարմարի հայ ժողովուրդի յարափոփոխ կարիքներու՛ն հետեւեալ մարզերէն ներս՝ մարդասիրական, առողջապահական, խնամատարական, դաստիարակչական, քարոզչական, մշակութային, ընկերային, կրթական:

Փետրուար 16, 2021

ՀՕՄ-ի Մոնթրէալի «Սօսէ» եւ Լաւալի «Շուշի» մասնաճիւղերու վարչութիւններ