ՀՅԴ Հայաստանի Գերագոյն մարմնի յայտարարութիւնը

ՀՅԴ Հայաստանի Գերագոյն մարմինը նախապէս հրապարկուած յայտարարութեամբ արտայայտել էր կուսակցութեան դիրքորոշումը Երեւանի աւագանու Սեպտեմբերի 17-ին կայանալիք ընտրութիւնների շուրջ ստեղծուած իրավիճակի վերաբերեալ:

Դիտարկելով աւագանու ընտրութիւններին առաջադրուած ուժերի մինչ այժմ արտայայտած հրապարակային մօտեցումները.

1. Վերահաստատում ենք, որ երեւանցին իր վճռական քուէով պէտք է թոյլ չտայ, որպէսզի անցնող հինգ տարիներին ինչպէս երկրի, այնպէս էլ մայրաքաղաքի կառավարումը տապալած, մեր Հայրենիքը օրհասական վիճակի հասցրած ՔՊ-ական իշխանութիւնը վերարտադրուի մայրաքաղաքում։ Երեւանի աւագանու ընտրութիւններում ՀՅԴ-ի համար հաւասարապէս անընդունելի եւ մերժելի են թե՛ ՔՊ-ն եւ թե՛ նրան բացայայտ կամ քօղարկուած կերպով աջակցող ուժերը,

2. Կոչ ենք անում ընտրութիւններին մասնակցող բոլոր առողջ ուժերին յստակ գնահատական տալ իշխանութեան կործանարար գործունէութեանը, հրապարակային եւ անվերապահ բացառել Երեւանի աւագանիում ՔՊ-ի հետ որեւէ միաւորման ձեւաւորումը կամ նրան աջակցելը, ինչպէս նաեւ հետընտրական համագործակցութեան պատրաստակամութիւն յայտնել միմիանց հետ,

3. Գնահատելով առ այս պահը հրապարակային արտայայտուած հիմնական դիրքորոշումներն ու հետապնդած նպատակի շուրջ արձանագրուած համապատասխանութիւնը, ՀՅԴ Հայաստանի Գերագոյն մարմինը կոչ է անում մեր հայրենակիցներին քուէարկել Անդրանիկ Թեւանեանի գլխաւորած «Մայր Հայաստան» դաշինքի օգտին։

Հ․Յ․ Դաշնակցութիւնն ընտրական յանձնաժողովներում իր ներկայացուցիչների գործուն մասնակցութեամբ վերահսկելու է ընտրութիւնների ընթացքը։

ՀՅԴ Հայաստանի Գերագոյն մարմին

Երեւան, 30 Օգոստոսի 2023 թ.