ՀՀ ԱԺ «Հայաստան» խմբակցութեան յայտարարութիւնը

ՔՊ-ն ս.թ. Հոկտեմբերի 2-ին Ազգային ժողովի արտահերթ նիստի օրակարգ է բերել մի յայտարարութեան նախագիծ, որը Նիկոլ Փաշինեանի կողմից հանրութեանը մոլորեցնելու հերթական փորձն է:

Յայտարարութեան նախագիծը ոչ միայն առնչութիւն չունի իրական խաղաղութեան հետ, որն այդքան անհրաժեշտ է մեր երկրին։ Այն չի համապատասխանում իրաւական, քաղաքական եւ Հայաստանի ու հայ ժողովրդի անվտանգ կենսագործունէութեան նուազագոյն պահանջներին:

ՔՊ-ն առաջարկում է բարձր գնահատել Ատրպէյճանի հետ Ուաշինկթընում ձեռք բերուած պայմանաւորուածութիւնները, որոնք եթէ անգամ ստորագրուեն, միջազգային պայմանագրերի մասին Վիէննայի կոնվենցիայի եւ ՀՀ սահմանադրութեան համաձայն, դեռ պէտք է անցնեն ներպետական ընթացակարգեր, մինչդեռ անտեսելով այս պահանջը՝ ՔՊ-ն շարունակում է պետական ինստիտուտները զաւթելու իր քաղաքականութիւնը:

Յայտարարութիւնում, ինչպէս նաեւ Ուաշինկթընում ընդունուած որեւէ համաձայնութիւնում տեղ չեն գտել ատրպէյճանական զինուած ուժերի կողմից Հայաստանի Հանրապետութեան ինքնիշխան տարածքներն ազատելու, Ատրպէյճանում ապօրինաբար պահուող հայ ռազմագերիների շուտափոյթ ազատ արձակման, արցախահայութեան անվտանգ վերադարձի իրաւունքի, Արցախում հայկական մշակութային ժառանգութեան ոչնչացումը կանխելու պահանջները:

Սա հերթական նուաստացուցիչ յայտարարութիւնն է, որը նոր սպառնալիքներ է ստեղծում Հայաստանի եւ հայ ժողովրդի համար:
Մերժելով այս վարքագիծը՝ ԱԺ «Հայաստան» խմբակցութիւնը չի մասնակցելու հակահայկական օրակարգի քննարկմանը։

Այս յայտարարութիւնը բացառապէս ՔՊ-ինն է եւ չի արտայայտում Հայաստանի Հանրապետութեան եւ հայ ժողովրդի հաւաքական կամքը:

ՀՀ ԱԺ «Հայաստան» խմբակցութիւն
02 Հոկտեմբեր 2025 թ.