Համազգայինի Երեւանի Գրասենեակի Նախաձեռնութեամբ Լոյս Տեսաւ «Հայոց Եկեղեցւոյ Դերը Պետականութեան Բացակայութեան Պայմաններում» Գիրքը
- (0)
Համազգային հայ կրթական եւ մշակութային միութեան Երեւանի գրասենեակի նախաձեռնութեամբ վերջերս լոյս տեսաւ «Հայոց եկեղեցւոյ դերը պետականութեան բացակայութեան պայմաններում» գիրքը, որ համանուն գիտաժողովի նիւթերու ժողովածուն է, եւ որուն մէջ ընդգրկուած նիւթերը կը վերարժեւորեն Հայոց եկեղեցւոյ պատմական դերը ազգային գոյաբանութեան եւ ինքնութեան պահպանման, կրթական, մշակութային զարգացման, ազգային ազատագրական պայքարի նախապատրաստման եւ առաջնորդութեան գործին մէջ:
Յայտնենք, որ Համազգային հայ կրթական եւ մշակութային միութեան Երեւանի գրասենեակի նախաձեռնութեամբ եւ Երեւանի պետական համալսարանի աստուածաբանութեան ու պատմութեան բաժանմունքներուն հետ համագործակցութեամբ, փետրուար 19-ին Երեւանի պետական համալսարանին մէջ կայացաւ «Հայոց եկեղեցւոյ դերը պետականութեան բացակայութեան պայմաններում» ժողովածուին շնորհահանդէսը, որուն օրը պատահական չէր ընտրուած. այն գիրք նուիրելու օրուան համընթաց էր, որ նաեւ մեծ լոռեցիին` Յովհաննէս Թումանեանի ծննդեան օրն է: Մարդ, որ ոչ միայն մեծ գրող էր, այլեւ` ազգի ցաւով ու ճակատագրով ապրող եւ պայքարող մտաւորական:
Շնորհահանդէսին բացումը կատարուեցաւ Համազգայինի Երեւանի գրասենեակի տնօրէն Ռուզաննա Առաքելեանի ողջոյնի խօսքով: Ան անդրադարձաւ գիրքին մէջ զետեղուած նիւթերուն կարեւորութեան` մատնանշելով, որ յատկապէս մեր օրերուն շատ կարեւոր են` անցած ճանապարհին վերարժեւորումը, անցեալի դասերէն ճիշդ եզրայանգումները եւ այդ ճանապարհին Հայոց եկեղեցւոյ դերակատարութեան ճիշդ գնահատումը:
Ներկաներուն ուղղուած խօսքով հանդէս եկան` Հայաստանի Գիտութիւններու ազգային ակադեմիայի Պատմութեան հիմնարկի տնօրէն Աշոտ Մելքոնեանը, Համազգային հայ կրթական եւ մշակութային միութեան Կեդրոնական վարչութեան անդամ Արտաշէս Շահբազեանը, փրոֆեսէօր Էդիկ Մինասեանը, Երեւանի պետական համալսարանի Հայոց պատմութեան ամպիոնի փրոֆեսէօր, Արման Եղիազարեանը, Երեւանի պետական համալսարանի պատմութեան բաժանմունքի ղեկավար, ազգագրագէտ Մխիթար Գաբրիէլեանը, դասախօս Մելանիա Բալայեանը, Արմէն Կարապետեանը:
Ձեռնարկին ընթացքին Ռուզաննա Առաքելեան ներկայացուց նաեւ Համազգայինի կողմէ հրատարակուած վերջին գիրքերը եւ օրուան կապակցութեամբ զանոնք նուիրեց ուսանողներուն:
