Կայացած Է Աննա Վարդանեանի` «Տիանա Աբգար. Հայ Առաջին Կին Պատուաւոր Հիւպատոսի Կեանքն Ու Ժառանգութիւնը Ճափոնի Մէջ» Գիրքին Շնորհահանդէսը

Տարիներ ի վեր Աննա Վարդանեանի գիտական հետազօտութիւններու առանցքային թեմաներէն եղած է հայ-ճափոնական յարաբերութիւններու պատմութիւնն ու զարգացումը: Իբրեւ ճափոնագէտ եւ հայ-ճափոնական յարաբերութիւններու անմիջական մասնակից, պահպանման ու զարգացման խթանող` իր մտքին եւ հոգւոյն մէջ պահած է հայ կնոջ մը` Տիանա Աբգարի կերպարը, որ զինք կ՛ոգեշնչէ դժուար պահերուն: Աննա Վարդանեան կը խոստովանի, որ անոր հայրենասէր եւ հայասէր օրինակելի գործունէութիւնը միշտ կ՛ուղեկցի իրեն` գործելու ի նպաստ հայրենիքի բարօրութեան, մասնաւորապէս հայ-ճափոնական յարաբերութիւններու զարգացման: «Տիանայի կերպարը ո՛չ միայն ոգեշնչման աղբիւր է, այլեւ` ուղենիշ, թէ ինչպէ՛ս կրնայ մէկ մարդու կամքն ու անսահման նուիրումը ստեղծել պատմական, մշակութային, դիւանագիտական ամուր կամուրջ` հեռաւոր երկու երկիրներու եւ ժողովուրդներու միջեւ», կ՛ընդգծէ Վարդանեան:

Տիանա Աբգար, ըլլալով հայ առաջին կին պատուաւոր հիւպատոս, իր անսասան հաւատարմութեամբ ու անմնացորդ նուիրումով կրցաւ աջակցիլ հայ ժողովուրդի փրկութեան, պաշտպանութեան ու Հայկական հարցի միջազգային հանրահռչակման գործին մէջ, կատարել իր ապրած ժամանակաշրջանին մէջ անհնարինը: Հայոց ցեղասպանութեան տարիներուն եւ յետոյ ան խորապէս կը ցաւի իր ժողովուրդին ճակատագրին, ապագայի համար` ո՛չ միայն ուղղակի կարեկցելով, այլ` գործուն քայլերով: Ան խորապէս ուսումնասիրած եւ զգացած է ժամանակի զարկերակը, նոյնիսկ կատարած է որոշ կանխատեսումներ` հայերու ջարդերու  ծաւալման եւ շարունակական բնոյթի վերաբերեալ: 1909 թուականի Ատանայի ջարդերէն ետք ան աշխուժացուցած է իր հասարակական եւ գրական աշխատանքները` հրատարակելով յօդուածներ, թղթակցելով բազմաթիւ տեղական եւ միջազգային պարբերականներու: Այդ տարիներուն անոր հրապարակումները նպաստած եւ միջազգային հանրութեան ուշադրութեան կեդրոնին մէջ պահած են հայ ժողովուրդի պայքարի, սեփական հողին մէջ ազատ ապրելու իրաւունքի հարցերու տեղեկացուածութիւնը միջազգային հարթակներուն վրայ: Անոր անմիջական միջնորդութեամբ կարելի դարձած է` Հայոց ցեղասպանութենէն փրկուած հարիւրաւոր գաղթականներու ներհոսքը Ճափոն, անոնց ժամանակաւոր կեցութիւնը, փաստաթղթային ձեւակերպումները եւ հետագային ապահով տեղափոխումը դէպի Սինկափուր կամ Միացեալ Նահանգներ…

Աննա Վարդանեան նշած է, որ այսօր ալ հայ-ճափոնական կապերու զարգացման գործին մէջ Տիանայի ժառանգութիւնը իրեն համար կը մնայ ազգային նուիրուածութեան եւ մարդասիրութեան բացառիկ խորհրդանիշ. այսինքն` գործել յանուն հայրենիքի, ոչ թէ` ժամանակի եւ պահի հրամայականով:

Աննա Վարդանեան «Տիանա Աբգար. հայ առաջին կին պատուաւոր հիւպատոսի կեանքն ու ժառանգութիւնը Ճափոնի մէջ» գիրքին մէջ ներկայացուցած է գիտահեն նոր փաստեր` Տիանա Աբգարի Ճափոնի մէջ գործունէութեան վերաբերեալ, ընդգծած է անոր տեղն ու դերը հայ ժողովուրդի եւ միջազգային հանրութեան պատմական յիշողութեան մէջ, ներկայացուցած է հայ կնոջ բացառիկ ուղին: Գիրքին հեղինակը նշած է, որ իր սրտին մէջ ան կը շարունակէ մնալ` իբրեւ տոկունութեան եւ համամարդկային արժէքներու մարմնաւորում:

Ընթացիկ տարուան նոյեմբեր 8-ին կայացաւ գիրքին շնորհահանդէսը Սան Ֆրանսիսքոյի մէջ: Աննա Վարդանեանի տարիներու հետազօտութիւնը տպագրուած էր յատուկ առիթով. Հայ կիներու միջազգային միութեան (AIWA) Սան Ֆրանսիսքոյի մասնաճիւղին կազմակերպած ձեռնարկին նպաստելուն, սատարելուն համար: Տարիներու գիտական- հետազօտական արդիւնքները ամփոփուեցան եւ գիրքի հարիւրաւոր օրինակներ ուղարկուեցան ովկիանոսին միւս կողմը` իբրեւ նուէր «Արումենիա-Նիպոնէ հայ-ճափոնական գիտական մշակութային միութեան» կողմէ: Կալա-երեկոն նուիրուած էր Տիանա Աբգարի կեանքին եւ ժառանգութեան ուղիին: Իբրեւ Տիանա եւ Լիւսիլ Աբգարներու հիմնադրամի նպաստառուներ` Հայ կիներու միջազգային միութիւնը յանձնառու է շարունակելու անոնց գործը «FoundHer» նախաձեռնութեան միջոցով: Այն կոչուած է հայ կիներուն աջակցիլ եւ ֆինանսաւորել` համաշխարհային իրաւապաշտպան գործունէութիւն ծաւալելու, ընտանիքները զօրացնելու, աշխատատեղեր ստեղծելու եւ համայնքները ամրապնդելու համար:

Հաղորդենք, որ Աննա Վարդանեան տնտեսագիտութեան թեկնածու է, ճափոնագէտ-միջազգայնագէտ, «Արումենիա-Նիպոն» հայ-ճափոնական գիտական մշակութային միութեան համահիմնադիր, նախագահ: Հայ-ճափոնական պատմական, մշակութային, դիւանագիտական առնչութիւններուն վերաբերող վեց գիտական հետազօտական գիրքերու, տասէ աւելի գիտական յօդուածներու, բազմաթիւ գիտական բացայայտումներու, հրապարակումներու հեղինակ, Հայաստանի պետական տնտեսագիտական եւ Երեւանի պետական համալսարաններու դասախօս, «ճափոնագիտութիւն» նիւթի հիմնադիրն է: