Խմբագրական. Յանուն գալիք սերունդներու յարատեւութեան

Շնորհիւ ՀՅԴ «Սողոմոն Թեհլիրեան» կոմիտէի անխոնջ եւ հետեւողական ջանքերուն, Թորոնթոյի հայ համայնքը այսօր կը թեւակոխէ որակական նոր ժամանակաշրջան մը, որ պիտի դրոշմէ թորոնթոհայութեան հաւաքական կեանքի յառաջիկայ տասնամեակներու ընթացքը։ 211 Consumers Road հասցէի վիթխարի համալիրին ձեռքբերումը պարզապէս տարածքային ընդլայնում մը չէ, այլ կազմակերպական կամքի եւ ռազմավարական հեռատեսութեան գլխագիր վկայութիւն։ Այս քայլով, Թորոնթոյի հայութիւնը կը հաստատէ իր վճռականութիւնը՝ դուրս գալու ներկայի սահմանափակումներէն եւ կերտելու ինքնաբաւ ու հզօր ապագայ մը։

Այս նախաձեռնութեան առանցքը կը կազմէ հեռահար ու հաշուարկուած հեռատեսութիւն մը։ 15,05 միլիոն տոլարի այս պատմական ներդրումը համայնքի տնտեսական ու կազմակերպչական հասունութեան լաւագոյն դրսեւորումն է։ Այնտեղ, ուր կամքէ անկախ սահմանափակումները սկսած էին արգելակել համայնքի կրթական գործունէութեան աճը, Թեհլիրեան կոմիտէն դիմեց համարձակ ու անկիւնադարձային քայլի մը՝ գիտակցելով, որ յարատեւութիւնը կը պահանջէ ոչ միայն տեսլական, այլ նաեւ խիզախ ու յանդուգն յանձնառութիւն եւ պատասխանատուութիւն։

Այս նոր համալիրը կոչուած է դառնալու ազգային ինքնութեան պահպանման արդիական միջնաբերդը։ Կրթական օճախներու վերակազմաւորումն ու գիտականօրէն հիմնաւորուած բաշխումը լոկ ենթակառուցային փոփոխութիւններ չեն, այլ որակական վերելքի պարտադիր նախապայմաններ։ Ստեղծելով զարգացման լայն հորիզոններ թէ՛ ուսանողական սերունդին եւ թէ՛ համայնքային կառոյցներուն համար, կոմիտէի որոշումը կոչուած է զօրացնելու համայնքի դիմադրողականութիւնը ուծացման վտանգներուն դէմ եւ բարձրացնելու անոր հաւաքական կենսունակութեան նշաձողը։

Այս հանգրուանին, ACC Beyond հանգանակային արշաւի վերամեկնարկը կը ստանայ նոր իմաստ ու պատմական խորք։ Անիկա հրաւէր մըն է իւրաքանչիւր հայորդիի՝ դառնալու այս տեսլականի համահեղինակն ու զօրակիցը։ Մեր այսօրուան զոհողութիւնն ու նիւթաբարոյական նուիրատուութիւնը պիտի ըլլան այն անսասան հիմքերը, որոնց վրայ պիտի բարգաւաճի վաղուան գիտակից, կազմակերպուած ու հզօր սերունդը։

Այս որոշումը կամքի յաղթանակն է ժամանակի մարտահրաւէրներուն նկատմամբ։ Ասիկա Թորոնթոյի հայութեան վճռական ուժն է՝ մնալու միշտ յառաջադէմ, միշտ աճող եւ հաւատարիմ իր ազգային վեհ առաքելութեան։

Յարատեւ վերե՜լք թորոնթոհայութեան եւ համայն գանատահայութեան։

«Հորիզոն»