Խաղաղութիւնը հնարաւոր է, երբ կայ արժանապատիւ պետութիւն, որը չի վախենում պաշտպանել սեփական հողը եւ իր քաղաքացիներին

Ի՞նչ է նշանակում համաձայնութիւն տալ փաստաթղթի, որտեղ չկայ գէթ մէկ կէտ, որը կը սահմանափակի Ատրպէյճանի պահանջները, գործողութիւնները կամ յայտարարութիւնները։

Օգոստոսի 8-ին Ատրպէյճանի հետ համաձայնագրի նախաստորագրումից յետոյ իշխող ուժը շտապեց յայտարարել, թէ խաղաղութիւնն արդէն իրականութիւն է։

Մենք բազմիցս հիմնաւոր կերպով ցոյց ենք տուել, որ այդ համաձայանագրով՝

– Ատրպէյճանը չի ճանաչել ՀՀ տարածքը յստակ սահմաններով,
– որեւէ կերպ չի զսպւում ատրպէյճանական նոր պահանջները Հայաստանի նկատմամբ,
– չամրագրելով արցախահայութեան վերադարձի իրաւունքը՝ Պաքուն չի հրաժարուել ատրպէյճանցիներին Հայաստանում բնակեցնելու ծրագրերից։

Փաստաթղթի նախաստորագրումից անմիջապէս յետոյ Ալիեւը Սիւնիքով անցնող ճանապարհը անուանեց «միջանցք», հայ հասարակութեանը՝ «հիւանդ», իսկ այսօր բաց տեքստով խօսում է Հայաստանի նկատմամբ նոր տարածքային պահանջների մասին։

Միեւնոյն ժամանակ, Հայաստանի իշխանութիւնը ոչ միայն չի արձագանգում, այլեւ իր քայլերով փաստացի ուժեղացնում է Ալիեւի դիրքերը՝

– հասարակութեանը ճշմարտութիւնը ներկայացնողներին պիտակաւորելով «ռեւանշիստ»,

– յայտարարելով, թէ Հայաստանի վերահսկողութեան տակ ատրպէյճանական տարածքներ կան,

– ակտիւացնելով Սահմանադրութեան փոփոխութեան գործընթացը, կրճատելով զինուած ուժերի ֆինանսաւորումը եւ զինուորական ծառայութեան ժամկէտը։

Այսպիսով, շատ կարճ ժամանակ պահանջուեց, որպէսզի Փաշինեանն ու Ալիեւը սեփական ձեռքով պայթեցնեն այն մեծ փուչիկը, որը ամիսներ շարունակ միասին փչում էին՝ ժողովրդին համոզելու, թէ խաղաղութիւն է հաստատուել։

Ալիեւի այսօրուայ յայտարարութիւնը դարձել է ամենաառարկայական ապացոյց ընդդիմութեան նախազգուշացումների ճշմարտացիութեան։

Ինչ վերաբերում է Օգոստոսի 8-ի համաձայնագրի ստորագրումը ողջունած պետութիւններին, ակնկալում ենք բոլորից՝ անյապաղ եւ հրապարակային ձեւով դատապարտել Իլհամ Ալիեւի կողմից Հայաստանի նկատմամբ ունեցած տարածքային պահանջները։

Հակառակ դէպքում ձեր ողջոյնները դառնում են ոչ թէ խաղաղութեան, այլ Հայաստանի նկատմամբ նոր ագրեսիայի նախապատրաստումը ողջունելու գործողութիւն։

Խաղաղութիւնը հնարաւոր է միայն այն ժամանակ, երբ կայ արժանապատիւ պետութիւն, որը չի վախենում պաշտպանել սեփական հողը եւ իր քաղաքացիներին։

Իշխան Սաղաթէլեան
ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ «Հայաստան» խմբակցութեան պատգամաւոր